Mamit panna kawngpui chhia sawiho

Páwl parukin kawng chhiat lutuk vanga kawngpui dan a tum phahna, Mamit district kawngpui chhia chungchang nimin khan bawrhsap Lalnunhlua kaihhruaiin DC Conference Hall-ah sawiho a ni. Dapchhuah leh Mamit inkar kawng chhia chu lirthei kal theiha vawiin thlenga siam a nih loh chuan naktuk aṭangin dan tum a ni.

DC Lalnunhlua chuan, inkalpawhna chungchangah harsatna a awmin district thuneitute hriattir vat turin kal khawmte a chah a; district administration aṭanga puih theihna awmah puih an inhuam reng thu leh tuna harsatna lian ber, Dampui khaw hnuaia NH-44A kawng ping mek titlang tura hnathawh pawh uluk taka an vil reng thu a sawi.

Bawrhsap sawi danin, Dâpchhuah leh Dàmpui inkara NH-44A kawngpui, mual min vanga kal theih loh chu kawngpui siam mektu Ratna Infrastructure Project-te kut a ni lo a, leimin thian turin a hranpain sorkar laipuiah sum dil ngai. Sum an dil ang an hmuh ṭhin loh avangin an thian fai zung zung thei lo a ni.

NH-44A kawngpui min vanga Dàmpui kawng hlui zawh theiha siam turin DC office-in theihtawp a chhuah nia sawiin Lalnunhlua chuan, State Diaster Response Fund leh sum awm remchang ang ang aṭangin nuamsa zawka lirtheite an tlan zawk theih nan thawm ṭhat hna thawh reng niin a sawi.

Mamit DC chuan, sorkar hmalak mekna tiṭhuanawp zawng leh mipui tana harsatna nasa zawk thlen thei zawnga pawl/mimal anga hmalakna nei lo turin mi tin a chah a ni.

Sorkar thuchhuah tarlan danin, leiminin NH-44A kawngpui a hnawh pin chu titlang turin hna thawh mek a ni a, kawng enkawltu Ratna Infrastructure chu khawl tam zawk hmang tur leh eng lai pawha hna thawk tura hriattir an ni. August 13, Inrinni aia tlai loah lirthei zawh theiha titlang turin hriattir an ni bawk.

Tarlan tawh angin, Mamit district-a pawl paruk chuan Mamit-Dapchhuah inkar NH-44A chu lirthei eng chi tan pawha zawh thei tura August 12, Zirtawpni ral hmaa tihtlang a nih loh chuan August 13, Inrinni aṭangin tiam chin awm loin kawngpui dan an tum thu an lo puang tawh a ni.

Mamit DC hoa kawngpui sawihonaah hian PWD, Kawrthah Division hnuaia Bairabi-Zamuang kawng thawm ṭhat mek chungchang pawh sawiho a ni a; chak zawka hna thawh a nih theih nan leh PCC pavement siam mekte a chàr hmaa rah chhiat a nih loh nan NH-44A kawng ping tihtlang a nih veleh Bairabi-Zamuang kawng chu hun eng emaw ti chhung khâr rih an rél.

Tarlan danin, Mamit leh Bairabi inkar kawngpui thawm ṭhat mek chu zawh a ni ṭêp tawh a, zawh thuai beisei a ni. PWD, Mamit Division-in a enkawl zingah kawng ping emaw, harsatna lian lutuk emaw a awm loh thu tarlan a ni bawk.