Nih tum inzâwt nawn fo turin zirlaite chah

Zawlnuam College chuan nimin khan zirlai tharte lawmna, Fresher Social an hmang a, khuallian Lalrindika Ralte, bialtu MLA chuan, an nih tum inzâwt nawn fo turin zirlaite a chah.

Lalrindika Ralte chuan, harsatna tâwk lo mihring an awm lo tih sawiin, "Kan bul ṭanna chu duhthusam a ni lo thei a, kan college pawh kan duhthusam a ni lo mai thei. Bul ṭanna hi a len a ngai lo a, kan tàwp dan hi a pawimawh. Ṭhalaite hi engtianga nun hmang tur nge kan nih a, eng nge nih kan tum tih hi kan inzawh nawn fo a ngai a ni," a ti.

Zawlnuam College hi kum 1986-ah din a ni a, kum 2007-ah sorkar college a ni ṭan. Tun dinhmunah subject paruk - Economics, Education, Political Science, Mizo, English leh History zir theih a ni a; zirtirtu 22 leh thawktu dang parukte'n zirlai 88 an awm enkawl mek a ni.