August ni 10 chhungin hripui vei 1,900 hmu

August 10, Nilaini khan Mizoramah Covid-19 vei mi 178 hmuh chhuah a ni a; August thla ni 10 chhungin mi 1,900 hmuh a ni tawh. Nimin khan hripui vei dam tawh mi 218 chhuahtir an ni a, Covid-19 vanga thi an awm lo.

Nilainia Covid-19 positive hmuh thar mi 178-te chu mipa 108 leh hmeichhia 70 an ni a; rapid antigen test hmanga hmuh chhuah vek an ni. Swab sample endik zat 1,087 aṭanga positivity rate chu16.38% a ni.

Hripui vei dam tawh nimina chhuahtir mi 218-te chu Aizawl district-a mi 49, Lunglei a mi 39, Mamita mi 30, Siaha leh Lawngtlaia mi 24 ve ve, Serchhipa mi 12, Champhaia mi 11, Kolasib, Saitual leh Khawzawla mi pariat ṭheuh leh Hnahthiala mi panga an ni.

IDSP record angin, Mizoramah Covid-19 vei 2,34,700 hmuh chhuah a ni tawh a, mipa 1,09,323 leh hmeichhia 1,25,377 an ni a, mipa aiin hmeichhia 16,054-in an tam zawk. Nimin tlai dar 5 thleng khan mi 2,33,115 (99.32%) chhuahtir an ni tawh a, mi 715 (0.30%) thi tawhin, enkawl mek mi 870 (0.38%) an awm.

Kum 2011 chhiarpui angin, Covid-19 vei hmuh tawh 2,34,700 chu state mipui zat aṭangin 21.39% a tling a; mi 1,000 zelah positive 214 an awm tawh ang a ni a, hripui vangin mi 1,00,000 zelah mi 65 an thi tawh ang a ni.