AMC-in in hmun him lo enfel an tum ; Aizawl himna kan ngai pawimawh - AMC Mayor

Aizawl Municipal Corporation (AMC) chuan 'AMC Site Development Slope Modification Regulation 2017' hmangin AMC huam chhunga in hmun him lo leh in sakna hmunhma him dan enfel an tum.

Vanglaini palai zawhna chhangin, AMC mayor PC Lalhmingthanga chuan, Aizawl himna an ngaih pawimawh thu sawiin, "Aizawl khawpui hi kan file lian a ni," a ti.

PC Lalhmingthanga chuan, AMC Site Development Slope Modification Regulation 2017 chu an nodal department, UDPA-in a pawmpui tawh a, hriattirna pawh an tichhuak tawh tih sawiin, regulation chu California, USA-a an hman ang entawna tih a nih thu leh mipuiin an zawh tâwk anga kalpui an tum thu a sawi.

Aizawla tuihâwk luan kawr felfai zawk neih a nih theih nan AMC ward hrang hranga hna thawhah tuihawk luankawr felfai tak siam zel tum a nih thu sawiin Mayor chuan, "Aizawl khawpui hi kan file lian zawk a ni a, Landslide Policy Committee pawh din a ni a, ṭum nga kan ṭhukhawm tawh," a ti.

PC Lalhmingthanga chuan, Aizawl khaw­puia tui luanna mumal lo lutukin chhiatna a thlen thei a ni tih an pawm thu sawiin, mipui tana a him zel theih nan in hmun laih dan tur leh in sak himna tur chu AMC Site Development Slope Modification Regulation 2017 angin hmalak tum a nih thu a sawi a, "Hman hunah chuan a ṭangkai hle turah kan ngai," a ti.

He dan hi AMC sorkar hmasaah siam a ni tawh a, UDPA-in April 4, 2017 khan pawmpuina leh hriattirna a tichhuak a ni.

Aizawl Mayor chuan, Aizawlah chhiatna a awmin local council-te'n an bialtu councillor an hriattir hnuah an en zui zel thu te, sum leh pai leh ṭanpuina awm theite an thawh zel thute a sawi.

AMC sorkar hmasa lama executive councillor-te hna chanpualah, Public Works Department zinga no. 2-ah 'Drains and sewerage' tih a awm avangin Aizawla tui luan­kawrte chu an khawih ve ṭhin tih a sawi bawk.

Lei min leh tawlh buaipuitu Landslide Policy Committee, AMC term hmasaa din chu an chhunzawm zel dawn tih sawiin PC Lalhmingthanga chuan, Landslide Hazard Map pawh an neih tawh thu a sawi a ni.