RD Minister-in CSS hnuaia An dept. hmalakna a sawifiah

Rural Development (RD) minister R Lalzir­liana chuan, Inrinni khan Aijal Club-ah thuthar thehdarhtute a kâwm a; Centrally sponsored scheme (CSS) hrang hrang hmanga RD department hnathawhte a sawifiah.

R Lalzirliana chuan, CSS scheme hrang hrang pasarih hmangin Mizo­ramah mipuite hamṭhat­na turte kalpui a nih thu a sawi a, "Tun hnai khan scheme zinga IAY hnuaiah Impressive Inplementation of the Scheme lawmman Gold Award leh Shyama Prasad Mukherji Rurban Mission (SPMRM)-ah scheme implementation-ah Mizoramin lawmman pahnihna a dawng a, lawmman hi department-a thawkte thawhhona ṭhat vang a ni," a ti.

MGNREGA hnuaiah approved labour budget azirin Ministry-in sum a pek ṭhin thu sawiin Lalzirliana chuan, "Sor­kar laipuiin sum a rawn pekte hi State Plan Fund-ah a lut a, Planning department leh Finance department pawmpuina lak leh a ngai ṭhin," a ti a; kum 2016-17 chhungin Mizoramah ni 52 vel inhlawhna siam theihna atan sorkar laipui aṭangin cheng nuai 14606.942 leh state matching share cheng nuai 699.816 hmuh a nih thu a sawi.

RD Minister sawi danin, Mizoram Rural Live­lihoods Mission hmangin district parukah hmalak a ni a; district parukah hian khaw 161-ah self help group 2,000 din tawh a ni. Sorkar kum kal mek atana propose budget chu cheng nuai 4566.20 a ni a, chuta ṭang chuan sorkar laipui aṭangin cheng nuai 1840 hmuh tawh a ni a, sum hmuh tawh hmangin khaw 13 tuam chhuah a ni tawh.

R Lalzirliana chuan, sorkar kum liam ta, 2016-17 chhungin Integrated Watershed Management Programme (IWMP) hnuaia hnathawh nan cheng vbc. 38.3500 dah a nih thu te, Border Area Development Programme (BADP) hmangin ramri hrûla awm RD block 16 chhunga khaw hrang hrangah hmasawnna hna thawh ṭhin a nih thu, Rural Housing Scheme hmangin khaw hrang hrangah hmasawnna thawh a nih bakah, rangva in chung nei lote pek tum a nih thute a sawi bawk.