Tlak hlau rorel bansan turin ZEM-in sorkar a chah
Zoram Exodus Movement chuan, rorel lai Congress sorkar chu assembly inthlan huna hman tur sum tuak ringawt buaipui lo a, ram hmasawnna hna lam ngaihtuah turin a ngen.
Thuchhuah siamin Exodus Movement chuan, contract hna lian tham zawng zawng thawktu chu Mizo mipuite hmelhriat phak loh state pawn lam mi deuh vek an ni chu mak a ti a, chung contractor-te chhiah pek tur cheng vaibelchhe 12 zet Mizoram sorkarin a lo ngaidam mai chu inthlan huna hman tur sum tuakna atana inremsiamna a ni ang tih ZEM chuan a hlauthawng hle tih thuchhuahah a tarlang.
Chhiah ngaihdam zat tamzia leh contractor-te hna thawh hmuh tur tlem em em si chu inbuk tawk lo hlein ZEM chuan a ngai a, kawnglaih hna te, sikul leh damdawi in building sak hnate hi inthlan huna sum tuakna hmanrua maiah Congress sorkar hian a hmang niin ZEM chuan a ringhlel a, tlak hlauh vanga hmasawnna hna tichingpen lo turin sorkar a phut bawk.
Party Unit hruaitu nih hi thlawhhma hlawk tak anga ngai an la awm fo hi politics kalphung chhe tak niin ZEM chuan a hria. Hralh leh tur contract hna inchuh ringawt eizawnna atana hmangte avangin hna tlo lo a, kum telin Mizoram mipuite hian kan tuar niin ZEM chuan a ngai a, chung mite chu hmasawnna tiṭhuanawptuah a puh a, endawng ngam turin Mizoram mipuite a ngen bawk.