RG Stadium enkawl MFA kutah: CM

Chief minister Lal Thanhawla chuan, Rajiv Gandhi Stadium chu Mizoram Football Association (MFA) enkawl tura dah a nih thu a puang.

MFA leh Football Players Association of India (FPAI)-te'n Inrinnia RG Stadium-a friendly match an buatsaih a hmanpuinaah Chief Mi­nister chuan thu sawiin, "Duat taka enkawl thei leh duat theitu turte kutah kan dah dawn. Tun MFA term kal lai mek chhung hi chuan RG Stadium hi an kutah dah a ni ang," a ti a; Mizorama football-in hma a sawn chhan chu MFA vang a nih thu a sawi.

Lal Thanhawla chuan, Lammual chu a nih tur anga hman a nih loh avangin kum tam tak daih tura ngaih ni mah se, kum 4/5 lekah a chhiat thu a sawi a, "Stadium leh infiamna hmun kan neihte hi kan rohlu a ni a, duat nachang leh dimdawi nachang kan hriat a ṭul. Mizoram hmun hrang hrangah infiamna ruhrel ṭha tak tak din tawh a ni a, din mek zel a ni," a ti.

Chief Minister chuan, RG Stadium chu sak chhunzawm tum a nih thu sawiin, "I-League khelh leh hmain khawchhak lamah gallery peih kan Sports Minister-in a tum a, stadium hi changtlung zawka enkawl a ni ang," a ti a; RG Stadium chu sumdawnna atan hman a rem loh thu a sawi.

Friendly match hi Home minister R Lal­zirliana leh Sports & Youth Services minister Zodintluanga te pawhin an en a ni.