Goods & Services Tax hman vanga Thil man danglam dâwrh tur a awm lo

Goods & Services Tax (GST) chu India ram pumah July 1, 2017 aṭangin hman ṭan a ni a, Mizoramah pawh hman ṭan ve nghal a ni. Taxation minister Lalsawta chuan, GST hman vangin thil man danglam dâwrh tur a awm lo tih a sawi.

Zawhna chhangin Taxation Minister chuan, tun hma lama chhiah lak dan thlaka GST hman a nih vangin bazarah thil man danglam chiam tur a awm lo tih a sawi a; dawrkaite'n tuna thil an zawrh mekte chu GST hman hmaa an lak a nih avangin an hralh dan pangngai angin an hralh phawt ang a, bungrua an lak thar leh hunah GST hman hnua thil siam chhuah thar an lak tawh dawn avangin a man danglam deuh tura beisei a nih thu leh, a hma aia a tlàwm zawk deuh beisei a nih thu a sawi.

Lalsawta chuan, GST anga chhiah lak ṭan tirh lai velah thil tihfel zui ngai tam tak a awm dawn avangin, inngaihhnathiamna eng emaw chen neih a ṭul dawn thu a sawi bawk.

Zawhna chhangin Taxation commissioner LH Rosanga chuan, GST Act, 2017 leh chumi hnuaia The Mizoram Goods & Services Tax Rules, 2017 chu July 1-a hman ṭan a nih theih nan sorkarin June 29, 2017-ah hriattirna a chhuah tawh tih a sawi.

LH Rosanga chuan, GST anga chhiah lak a nih theih nan chhiah pe turte inziah luh hun pawh a hma daih aṭangin hawn a ni tih a sawi a, "Inziak lut duhte'n harsatna an tawh loh nan Taxation department officer-te chu mipui thil hriat duh hrilh thei tur leh puih an ngaihna apianga pui turin eng lai pawhin online-in dawr theih reng an ni a, telephone-a dawr duh tan pawh biak theih rengin an awm a ni," a ti.

Commissioner of Taxes chuan, GST hman a nih tak avangin thawktu indaih lohna eng emaw chen a awm a rin thu sawiin, thawktu lak belh an dilna angin sorkarin Inspector of Taxes mi panga lak belh a phalsak tih a sawi a, lak belh turin bawhzui mek a nih thu a sawi.