Keifang-Tuivawl inkara lei min thian zel

Aizawl-Champhai kawnga Keifang leh Tuivawl inkara lei min chu awlsam zawka lirthei an kal theih nan siam chhunzawm zel a ni a, ruah a sûra lei tla thar awm ṭhin chu thenfai nghal zel a ni.

Lei minna hmun hi June 30 leh July 1 khan PWD chief engineer (Highway) K Lal-sawmvela'n a hmunah a tlawh a; lei minna kawng thlanga ram neitu, Rulchawm V/C member Lalhmuzuala'n PWD hotute nen an inbiak hnuah a ramah lei nawr thlak a remti tawh a, vawiin aṭangin chak zawka lei paih hna hna thawh theih a nih tawh tur thu a sawi.

Lalhmuzuala ramah hian lei nawr thlak a nih dawn avangin a huana oil palm, thingrái, thingfanghma leh thlai dangte chu July 1 aṭang khan hmun dangah phun sawn a ni.

Lei minna chunga 132kV Power line thlunna tower pawh a tluk a hlauh-awm dan Power & Electricity department hotute'n an enfiah tawh. P&E hotute chuan, tower chu a tluk a la hlauhthawnawm lutuk lo a, lei a min zel erawh chuan tlu mai thei tur a nih thu leh, a sawnna tur hmun zawn a ngai dawn thu an sawi.