KHAWTHLIR

State Bank Day
State Bank of India (SBI), Regional Business Office, Aizawl chuan July 1, Inrinni khan State Bank Day an hmang a, The Salvation Army enkawl Muanna In Boys Home, Mualpui ṭanpui nan buhfai leh ei tur dang ṭhahnem tak an pe a; tuilian tuartu Sairang leh Tlabung khuaa harsatna tâwkte ṭanpui nan Sairang YMA hnenah Rs. 70,000 leh Tlabung YMA hnenah Rs. 34,500 an pe. SBI branch dangte pawhin home ṭhenkhatah ṭanpuina an pe bawk.

Creative Clicks
Chanchinbu (magazine) thar, 'Creative Clicks' tih chu MJA president Vanlalrema Vantawl-in IPR Auditorium-ah Inrinni khan a tlangzarh. Thla khata vawi khat chhuak tur a ni a, colour vek tur niin, bu khat Rs. 120 man a ni ang.

Thisen pe
Inrinni khan Isua Krista Kohhran (IKK) ṭhalaite'n Aizawl Civil Hospital tan thisen unit 112 an pe a, a petute mipa 75 leh hmeichhia 37 an ni. Bungkawn Vengthar Branch KṬP-in Synod Hospital tan unit 42 an pe a, a petute mipa 40 leh hmeichhia pahnih an ni.

CM relief fund
Mizoram Football Association leh Football Players Association of India chuan Inrinni khan Chief Minister's Relief Fund-ah Rs. 1,00,000 ve ve an chhûng lut. MFA chuan Inrinnia RG Stadium-a khelmuala an sum hmuh aṭangin thawh belh an la tum thu an puang.

Biak-in hawng
St. Peter's Church, Kawnpui biak-in thar chu Inrinni khan Aizawl bishop Most Rev. Stephen Rotluanga'n Pathian hnenah hlânin a hawng.

SA Founders Day
Nimin Pathianni khan Salvation Army Founders Day a ni a, he ni pual hian SA corps leh society hrang hrangin Inrinni khan vantlang tana thil ṭha tihna ní atan an hmang a, an awmna khua/veng chhung an tifai a ni.

Health Sunday
Nimin Pathianni khan Mizoram Presbyterian Kohhran chuan Health Sunday & Hospital Sunday an hmang. Health Sunday pual hian nimin chawhnu inkhawmah hun hman a ni a, thupui chu 'Kala lungte awm' tih a ni. Hospital Sunday pualin zan inkhawmah hun hman a ni a, thupui chu 'Damna kim Isua' tih a ni.