FCI buhfai chhêkkhâwlte endik tawh dawn ; Buhfaiah harsatna tur a awm lo - Ronald Sapa

Food Corporation of India (FCI) State Level Consultative Committee (SLCC) chuan buhfai chhêk khâwlte Food Safety Control endiktir an rel. Committee chairman Ronald Sapa Tlau, Rajya Sabha MP chuan, tun dinhmunah Mizoram tan buhfaiah harsatna tur a awm loh thu a sawi.

Ronald Sapa Tlau hian nimin khan SLCC meeting zawhah Aijal Club-ah thuthar thehdarhtute a kâwm a; tun dinhmunah buhfai chhêk khawl a ṭha thawkhat nia sawiin, "Mipui tan chî-âi chhan tur a awm lo. FCI kudamah buhfai chhek khawl sa metric ton 11,301 a awm mek a, naktuk hian metric ton 1,200 dang a lo thlen belh leh dawn. Fûr ruahtui tlak chhunga mipuiin harsatna an tawh loh nan theihtawp chhuaha hmalak mek a ni," a ti.

Food Security Act (FSA) hman a nih hnuah economic cost-a Mizoramin buhfai a dawn zat chu a tlêm tâk avangin sorkar laipuiah pek belh tura ngen mek a nih thu sawiin Ronald Sapa chuan, "Kan dil belh ang hian Ministry of Consumer Affairs chuan June 28, 2017 khan metric ton 7,000 min pek belh an remti a; thil lawmawm a nih rualin, phurh chhuahna lamah harsatna a awm thei a ni," a ti. Buhfai phurhna atan truck 130 vel a ngaih dawn avangin, truck neitute chu rilru zau tak pu turin a ngen.

Ronald Sapa Tlau chuan, Tanhrila FCI Kudam chu sawn chhuak turin chak taka hmalak zel a ni tih a sawi a, "FCI hotute duh anga rél luh theihna hmun hmuh remchan a nih mai loh avangin Sairang Dinthar Venga Supply department-in ram a pek chu pawm mai tura ngen an ni. A hmun hi hmarchak bialtu FCI hotute'n an enfiah hunah tihfel theih beisei a ni," a ti.

Rajya Sabha MP sawi danin, tun hnaia kawng chhia leh tui lian vangin mipuiin buhfaiah harsatna an tawh phah hriat a la ni lo. Mipuiin harsatna an tawh loh nan hmun kilkhawr zual deuhah buhfai chhêk khawl lâwk a ni a, ei tur neih loh vanga harsatna tâwk an la awm lo.

Nimina Aijal Club-a FCI SLCC ṭhukhawm chuan, buhfai chhêk khawl reng reng fimkhur loh vang emaw, a awm rei vang emawa chhe thei a nih avangin, Health department hnuaia Food Safety Control chu FCI-in buhfai a chhêk khawlte endiktir ni ve tawh se, an ti.

Meeting chuan, FCI-in Mizo­rama buhfai a lak luh zingah mipuiin Haryana buhfai an duh deuh bik nia a lan avangin, FCI hotute chu Haryana buhfai chauh pe tura ngen an rel a; Champhai tlangdung leh a chhehvel châwm turin Kawlkulhah FCI kudam sak dan ngaihtuah ni se, an ti bawk.