MCHTA-in thawh chhunzawm inbeisei

Mizoram CSS Hindi Teachers’ Association (MCHTA) hruaitute chuan, Union Home minister Rajnath Singh-a'n Mizorama a rawn zin ṭumin, CSS hnuaia Mizorama Hindi zirtirtu mi 1,305-te hna thawh chhunzawmtir an nih tur thu a sawi chu a hlawhtlin ngei an beisei thu an sawi.

MCHTA hruaitute hian nimin khan Aizawl Press Club-ah thuthar thehdarhtute an kâwm a; an president Lalchung­lura chuan, Union Home minister Rajnath Singh-a’n chief minister Lal Thanhawla nen an inkawm ṭuma CSS Hindi teacher 1,305-te hna chhunzawmtir leh vek an nih tur thu a sawi chu lawmawm an tih thu sawiin, "Union Home Minister thu sawi hi thlamuanthlak kan a, Central sorkar chungah lawm­thu kan sawi a ni," a ti.

Lalchunglura chuan, "Mizoram sorkarin an fa hrinte kan nihzia leh kawng laka min thlauhthlak an tum lohzia an sawi tawh angin, min enkawl chhunzawm zel hi an tih tur dik tak a nihzia hai loa kan tana theihtawp chhuah a, Central-a min ngensaktu CM Lal Than­hawla kaihhruai sorkar chungah kan lawm hle a ni," a ti a; zirlai tam tak, Hindi zir thei loa awm mekte'n pangngai taka Hindi an zir leh thuai theih nan chak taka hma la a, appointment order tichhuak thuai turin sorkar an ngen tih a sawi.

MCHTA President chuan, lungawi lohna an lantir laia hma an laknaah, sorkar pawi an khawih vanga MCHTA hruaitute leh member ṭhenkhat mante thubuai siamsak chu Chief Minister, Edu­cation Minister leh Home Minister hnena ngaihdam an dil angin, thubuai tihtawpsak an nih thu a sawi a, "Mizoram sorkar chungah lawmthu kan sawi tak meuh a ni," a ti.

Zawhna chhangin MCHTA hruaitute chuan, an contract period a tawp hun, February 2017 thlenga an hlawh chu sor­kar laipui aṭanga sum hmuh a nih angin Mizoram sorkarin a pek vek tawh thu an sawi a; Mizorama CSS hnuaia Hindi zirna chungchang enfiaha rawn kal, evaluation team-in report an pek dan chu an hriat loh thu an sawi bawk.