Tuia harsatna chinfel dan tur sawiho

Tun hnaia lei min leh ruah sur nasa vanga tui harsatna chinfel dan tur ngaihtuahin PHE engineer-in-chief C Lalmuanzova hoin PHE hotute nimin khan an ṭhukhawm a; ruahtui a tam thei ang ber khawl turin chhungkawtin an ngen.

Meeting chuan, tui sem khaihlakna hmun-ah theihtawp chhuahin chhun leh zan zawmin hna an thawk mek tih tarlan an tarlang a; tui lakna leh tui pump chhiat vanga tui harsatnaah mipui hriat-thiamna an dil bakah, tui harsatna a ziaawm theih nan ruahtui a tam thei ang ber khawl turin chhung-kawtin an ngen a ni.

PHE hotute chuan, "Tui lianin nasa taka tui lakna leh pump khawlte a tihchhiat avangin Aizawl khawpui tui sem hi kar thum chhung mumal takin tih theih a ni ta lo a, mipui hriatthiamna kan ngen tak meuh a, khuain a zir chuan kar leh lamah chuan mumal zawka tui sem theih a beiseiawm," an ti.

Aizawl khawpui tui lakna bakah, district headquarters leh thingtlanga tui laknate pawh a chhe nasa hle tih tarlangin PHE hotute chuan, "Tui lakna chhe nasa zual siamṭhat leh nan a ṭul angin estimate pawh siam a ni," an ti a; estimate chu Disaster Management & Rehabilitation-ah thawn tawh a ni a, sum sanction nghah mek a nih thu an tarlang.

Tui pump-a harsatna thlen dan

Greater Aizawl Water Supply Scheme Phase-I: Tlawng lui tui hîpna VT pump, chirhdiakin a tihbuai chu siam mek a ni a, desilting (chirhdiak paih) zawh thawkhat a ni tawh. Raw Water Pump khawlte nen tui pump theih thuai beisei a ni. Tun dinhmunah lei hîpna hmangin Vaipuanpho aṭangin tui lak a ni a, Tuikhuahtlangah pump chhoh reng a ni.

Ruah a sûr tam chauh-in pump khawl pahnih hmangin tui a pump theih a ni a, nimin khan single (pump pakhat) chauh hmanga tui pump a ni. GAWSS Phase-II a Raw Water Pump pakhat nen ṭangkawpin tui pump khawl pahnih hmanga tui pump mek a ni bawk.

Greater Aizawl Water Supply Scheme Phase-II: Tlawng lui tui hîpna raw water pump chirhdiakina a tihbuai chu kar thum vel a ni tawh a, a theih ang anga siam niin, khawl pahniha pump theih a ni tawh. Raw water pump no. II khawl a la buai avang-in nimin khan tui pump theih a ni lo a, siam zawh thuai beisei a ni. Lei tla-hniamin Serlui-A tui lakna a tihchhiatnaah pawh, JCB-in leivûng a paih zo tawh a, welding machine phur luh mek niin, tun kar chhungin welding hna zawh beisei a ni.