Tlabungah x-ray tech-nician dah turin ngen

Tlabung Progressive Society (TPS) chuan thuchhuah siamin, Tlabung damdawi-inah x-ray technician dah thuai turin Mizoram sorkar an ngen.

TPS chuan, Tlabung damdawi-inah x-ray khawl ṭha tak an nei a, mahse, kum thum chuang x-ray technician an awm loh tawh avangin khawl chu hman lohin a awm reng a, mipuiin harsatna nasa tak an tawh phah mek niin an sawi.

Tlabung damdawi-in chu Tlabung leh a chheh-vel khaw 30 chuanga mite'n damdawi-in an pan tur awmchhun a nih thu sawiin TPS chuan, "District hospital pan tur kan neih hnai ber chu km. 97-a hla Lunglei a ni a. Damlo tam takin Lunglei an pan a ngaih phah fo a ni," an ti.

TPS chuan, sorkar hotute hnenah x-ray technician an mamawh thu an lo thlen chángin, rawih tur an awm loh thu leh Tlabunga awm tur an zawn hmuh a ngaih thuin an lo chhang tawh ṭhin tih an sawi a; Tlabung chhuak anga chhàl theih Betsy Hmingthianghlimi'n a zawh fel tawh avangin, Betsy Hmingthianghlimi chu Tlabung damdawi-ina x-ray technician atan July thla chhung ngeia chhawr turin sorkar an ngên a ni.