Airgun nei turin license a ngai tawh

Home department chuan thuchhuah siamin, silai zawrh, lei leh kawl chungchangah hriattirna a tichhuak a; airgun nei tur tan pawh licence neih vek a ngaih tawh tur thu a tarlang.

Home department tarlan danin, Ministry of Home Affairs-in July 15, 2016-a Arms Rules, 2016 a tihchhuah angin, mi tu pawhin airgun emaw, silai lem/siamchawp (firearm replica) emaw, zên chauh phuh chhuak thei silai (blank firing gun) emaw, battery hmang tiang (battery operated baton) emaw neih a duh chuan, thuneitu hnen aṭangin phalna (licence) lak tur a ni.

Airgun, 20 joules leh a aia na kâp thei chin leh a dáwt lian chi (.22/5.5 mm leh a chung lam)-te chu licence tel loa kawl phal a ni tawh lo a; .177 calibre pawh khuahkhirh a ni. Arms Act, 1959 Section 3-in mi pakhat tan silai pathum aia tam neih a phal loh avangin, licence neih ngai chi airgun reng reng chu silai pathum neih theih zingah chhiar tel tur a ni.

Airgun neitu chuan District Magistrate hun bituk chhungin a airgun kengin District Magistrate emaw, Sub-Division Officer (Civil) emaw, Block Development Officer (BDO) emaw hnenah a inhriattir tur a ni a, chutiang ti lote chu Arms Act, 1959 leh Arms Rules 2016 beh-chhanin hrem theih an ni.

Hriattirna hian Mizoram Rifle Association (MRA) leh a hnuaia inziak lut rifle club/association-te a huam lo thung.