Schedule Tribe Girls Hostel hawng

Lunglei Serkawna Schedule Tribe Girls Hostel sak thar chu nimin khan Social Welfare minister PC Lalthanliana'n a hawng. Hostel hi cheng nuai 192.18 sênga sak a ni.

Minister PC Lalthanliana chuan, ram a changkang a, hmasawnna pawh a chak tih sawiin, "ST Girls Hostel hi kawng hrang hrangah hmeichhiate tan a bika ham-ṭhatna sorkar laipuiin a siam pakhat a ni a, zirna senso hautak loa zir theihna leh awm theihna tura tih a ni. Thingtlang kilkhawr zawka mite'n an chhawr ṭangkai ngei ka beisei," a ti.

PC Lalthanliana chuan, a bial chhunga hmasawnna ṭhenkhat sawiin, "Hmasawnna tam tak hmuh tur a awm avangin bial chhunga khua leh mipui kan ṭanrual chuan, model constituency-ah kan siam thei ang," a ti a; hmasawnna ṭha neih theih nan mipuiin sorkar an ṭawiawm a, an tih ve theihte an ngaihtuah a pawimawh thu a sawi.

Social Welfare department leh NECS-in MoU an sign angin, Serkawn ST Girls Hostel hi turn key basis-a sak a ni. Ministry of Tribal Welfare-in Tribal Hostel Scheme aṭangin Social Welfare department kaltlangin project siam a ni a, a sak nan cheng nuai 192.18 hman niin, a sakna sum chu sorkar laipui tum vek a ni.

Hostel building hi January 2016-ah sak ṭan niin, June 2017-ah sak zawh a ni a, chhawng thuma sak a ni.