KHAWTHLIR

YMA Directory
Central YMA-in YMA Telephone Directory 2022 an siam chu nimin khan CYMA president R Lalngheta'n CYMA Office Bearer Room-ah a tlangzarh. CYMA hian kum khat danah YMA Telephone Directory a siam ṭhin a, kumina a siam tharah hian CYMA Committee, CYMA hnuaia sub-committee member-te leh YMA sub-headquarters, group leh branch 816 hruaitute mobile phone number dah a ni a; Rs 100-in lei theih a ni.

Thisen pe
KM Higher Secondary School NSS chuan nimin khan an sikulah blood donation camp an huaihawt a, Civil Hospital Aizawl tan thisen unit 53 an pe a, petute mipa 41 leh hmeichhia 12 an ni.

LMC hotu tur ruat
Lunglei Municipal Corporation (LMC) din turin Mizoram sorkarin hma a la mek zel a; LMC chief executive officer atan Benjamin Lalzama, MCS ruat a ni a,secretary atan R Vanrengpuia, MCS ruat a ni bawk. LMC CEO leh secretary turte ruatna hi nimin khan DPAR department-in a tichhuak a, MCS officer dang eng emaw zat siksawi a ni bawk.

Chawimawina hlân
August 8-9, 2022 chhunga International Conference on Recent Advances in Agricultural, Biological and Applied Sciences leh Biotic Science Congress 2022-ah KVK, Kolasib-a senior scientist leh head Dr Michelle Lallawmkimi chu Best Extension Professional Award 2022 hlan a ni. Dr Michelle Lallawmkimi hian kum 2020 khan Best Woman Scientist Award a lo dawng tawh bawk.

Lirthei dah phal lo
Aizawl Traffic SP Rodingliana Chawngthu chuan, August 15, Thawhṭanni zing dar 8-ah Lammualah Independence Day lawm a nih dawn avangin August 14 zan dar 6 aṭanga August 15, 2022 zing dar 10 thleng Canteen Kual leh Vanapa Hall inkar kawngpui sirah lirthei dah/hûn phal a ni lo tih a puang.

Lei zawh phal chin
Serchhip SP Stephen Lalrinawma chuan nimin khan thupek chhuahin, Keiṭum leh Khawlailung inkara Tuichang lei chu lirthei metric ton 10 (quintal 100) aia rit phur tan zawh khap a nih thu a tarlang. Leiah darkar khata km. 10 aia chaka tlân phal a nih loh thu a tarlang bawk.