Larsap leh NIT Director inkâwm

National Institute of Technology (NIT), Mizoram director thar, Prof. Rajat Gupta chuan nimin khan Raj Bhavan-ah Governor Lt.Gen. Nirbhay Sharma a kâwm.

Larsap chuan, Mizo­ram chu ram rálmuang leh nuam tak a nih avangin hmasawn tura hna thawhna kawngah harsatna a awm loh thu a sawi a, "Mizoram NIT hmasawnna tur chuan a hmasa berah zirna hmun nghet leh chenna hmunhma changtlung zawk a ngai. Heng bakah hian, zirtirna ṭha zawk nei thei turin university dangte nena thawhhona ṭha neih a ngai a, sorkar nena inlungrual taka thawhho zel pawh tihmâkmawh a ni," a ti.

Prof. Rajat Gupta chuan, NIT-Mizoram tih­changtlun a nih theihna turin theihtawp chhuah a tum thu sawiin, thurâwn a neihte chu tihhlawhtlin ngei a tum thu Governor a hrilh a ni.