Covid-19 vei mi 12 hmuh belh Vei tawh zat 284, vei mek 108

July 17, Zirtawpni khan Zoram Medical College (ZMC) labora­tory-ah Covid-19 hripui vei mi 10 hmuh chhuah a ni a, July 18, Inrinniah mi pahnih hmuh chhuah a ni leh bawk. Hetih lai hian, Inrinni khan Covid-19 vei dam tawh mi pasarih chu enkawlna hmun aṭangin chhuahtir an ni.

Mizoramah Covid-19 kai hmuh chhuah tawh zat chu mi 284 an ni a, chu'ng zinga mi 176 (61.97%) chuan an vei tawh lo a, mi 167 (58.80%) chhuahtir an ni tawh a, negative tawh si la chhuahtir loh mi pakua, Lunglei district-a BSF mi leh sate an awm. Mi 108 (38.03%)-in hripui an la vei mek.

Inrinni khan Siaha Dedicated Covid Health Centre (DCHC) aṭangin Covid-19 vei dam tawh mi paruk, mipa pakhat leh hmeichhia panga chhuahtir an ni. Siahaah hian hripui vei mi pathum (mipa pahnih leh hmeichhia pakhat) an la awm mek. Kolasib-ah pawh Inrinni vêk khan DCHC aṭangin Covid-19 vei dam tawh hmeichhe pakhat chhuahtir a ni bawk a; heti hian Kolasib district-ah hripui vei an awm tawh rih lo.

July 17 khan ZMC laboratory-a mi 160-te swab sample endikah Covid-19 vei mi 10 hmuh chhuah a ni a; naupang kum 7 mi pakhat leh puitling pakua, kum 21-50 inkar, mipa pakua leh hmeichhia pakhat, Aizawl district mi panga, Siaha district mi pathum leh Champhai district mi pahnih an ni. Hetih lai hian, thu dawnna pakhat chuan, Champhai district mi anga chhinchhiah mi pahnihte hi Myanmar lam mi ve ve an nih thu Vanglaini palai a hrilh.

Zirtawpnia hripui vei hmuh thar mi 10-te hi tun hnaia Assam, Bihar, Delhi, Rajasthan, Uttar Pradesh leh West Bengal aṭanga haw an ni a, mi pathumin harsatna (symptom) an neih laiin, mi pasarihin an nei lo. Positive zinga pali chu hnam dang, National Disaster Response Force (NDRF) mi, quarantine lai mek an nih thu sorkar thu­chhuah chuan a tarlang.

July 18, Inrinni khan ZMC laboratory-ah State Referral Hospital, Aizawl, Lawngtlai, Serchhip leh Saitual aṭanga dawn mi 148 (mipa 99 leh hmei­chhia 49)-te sample endik aṭangin Covid-19 vei pa­hnih hmuh chhuah a ni a, Aizawl district mi, symptom nei lo ve ve an ni. Sorkar thuchhuahin a tarlan danin, mipa hi kum 27 mi, July 7-a Delhi aṭanga rawn lut a ni a, hmei­chhia chu kum 46 mi, Bihar aṭanga July 11-a rawn lut a ni.