MNF-in CADC sorkar ṭhiat thuai phûtna Memorandum Governor-ah thehlut nawn
Chakma district-a MNF chuan nimin khan Governor Lt.Gen. Nirbhay Sharma hnenah Chakma Autonomous District Council (CADC) sorkar ding mek ṭhiat tura ngenna leh phûtna memorandum an thehlut nawn.
CADC huam chhunga MNF-te hian Governor hnena memorandum an thehluh hi nimin khan Chawngte SDO (Civil) hnenah an thehlut a; memorandum rual hian, Congress MDC-te hnena chief executive member (CEM) Kali Kumar Tongchangya-a'n an sum bat rûl tura a hriattirna lehkha an thil tel.
Chakma district MNF-in CADC-a Congress MDC 10-te'n sorkar sum an bat dan an tarlan chu - Adi Kanta Tonchangya - Rs. 31,29,410; Susen Chakma - Rs. 14,93,090; Tarani Sen Chakma Rs. 14,32,694; Sushil Kumar Chakma - Rs. 10,37,646; Mohan Chakma - Rs. 7,60,510; Chitra Kumar Chakma - Rs. 7,65,904; Ajay Kumar Chakma - Rs. 11,78,605; Amar Smriti Chakma - Rs. 2,11,000; Parimal Chakma - Rs. 5,92,278 leh Amit Kumar Chakma - Rs. 30,000 a ni. A vaiin Rs. 1,06,31,137 a ni.
MNF memorandum chuan, CEM-in leiba ṭhìnna lehkha a thawn Congress MDC 10-te chu CEM Kali Kumar Tongchangya duh lotute an nih thu an tarlang a; anni bakah Congress MDC 11-te pawhin MADC sorkar-ah leibá tam tham tak an nei a, chu'ngte chu MADC sum hmangin an siam rem ṭhin niin an tarlang.
Chakma district MNF-te chuan, CEM Kali Kumar Tongchongya-a'n sorkar siam theihna khawp thláwptu a nei tawh lo chunga CADC sorkar ṭhiah a la ni lo chu mak an tih thu sawiin, "Hei hian corruption nasa zawk a thlen a ni," an ti.
MNF tarlan danin, CEM-in thlawptu a neih tam tawk tawh loh hnu, thla thum kal ta chhungin CADC sorkarin awmzia a nei tawh lo a; Congress MDC-te chu thla hnih chhung chu Aizawlah an awm tawh a ni. NGO hrang hrangte'n CADC sorkar laka lungawi lohna an lantir fo bawk.
Hengte avang hian Chakma district MNF-te chuan CADC sorkar chu a rang thei ang bera ṭhiah a, inthlan ṭhat buatsaih thuai an duh a ni.
Chakma district MNF memorandum-ah hian an president Rasik Mohan Chakma leh treasurer H Amaresh Chakma ten hming an ziak.