Bawlhhlawh paihna tur lirthei enfiah

SIPMIU-in bawlhlawh ṭawih thei leh ṭawih thei lo phurtu tur motor 54, Aizawl Municipal Corporation (AMC) hnena an pek turchu nimin khan AMC councillor-te leh SIPMIU hotute'n an enfiah.

Bawlhhlawh phurhna tur lirthei lei tharte hi TATA LPK 407 truck 50 leh Xenon pick-up pali a ni a, tun hnai khan Aizawlah rawn thlengin, Rangvamuala Ch. Chhunga Truck Terminal-ah dah a ni.

Motor-te hi SIPMIU project pakhat, Solid Waste Resource Management Project sum hmanga lei a ni a; bawlhlawh paihtute'n an bawlhlawhte a ṭawih thei leh ṭawih thei lote paih tur an hriat hran theih nan motor chu rawng hring leh a pawla siam a ni.

Aizawl mayor PC Lalhmingthanga chuan, khawpuia bawlhlawh pung zel vangin bawlhhlawh sawngbawlhna hmun pakhat aia tam neih a la ngaih tur thu a sawi a, "Aizawl khawpui chhunga bawlhhlawh paih nan kum khatah cheng nuai 400 vel sen ṭhin a ni a, bawlhhlawh paihna atan ni tin lirthei 120 vel tlan ziah ang a ni," a ti.

Aizawl Mayor chuan, bawlhhlawh phurhna tur motor-te chu a ṭha tawka an hriat thu a sawi a; chutih rualin, a body sak danah duhthusam lo lai deuh awm nia sawiin, chu chu SIPMIU hotute nen sawihoa siamṭhat dan tur la ngaihtuah leh a nih tur thu a sawi bawk.

SIPMIU project director Valbuanga chuan, Aizawl khawpuia bawlhhlawh ṭawih thei leh ṭawih thei lo thliar hranna hmun tur Tuiriala an siam mek chu ruahtui a tlak tam avangin duh angin hna a chak thei lo tih a sawi a; ruahman anga thil a kal tluan chuan December 2017 emaw January 2018-ah emaw hawn theih an beisei thu a sawi.