Champhai NGO-te'n an khaw kawng siam ṭhat thuai an phût

Champhai NGO Coordination chuan thuchhuah siamin, Aizawl leh Champhai inkar kawngpui chhia chu siam ṭha thuai tur leh, kawng chhia vanga harsatnate chingfel thuai turin sorkar an phût.

Champhai leh Aizawl inkar kawng chu kawng lûn ber pawl a nih thu sawiin, Champhai NGO-te chuan, chuti chung chuan sorkarin a ngaihsak tâwk lo niin an sawi a, "Sorkarin a ngaihsak tâwk lo hi hriatthiam har kan ti hle," an ti.

Champhai NGO-te tarlan danin, fûr inṭan hmaa kawng chhe sa chu ruahtui tlain nasa takin a tihchhiat belh a; chuvang chuan kawng laia motor lian tlu te, hnuhchhuah ngai khawpa motor tángte a tam phah hle. Champhai lam motor-te'n Serchhip lamah an hêl a ngai fo a, mipui mamawh phurtu motor ke 12 nei tlân khap ngai khawp leh damlo phur tan zawh tlak loh khawpa chhia niin an sawi.

Kawng ṭha lo vangin Champhai district-ah ni tin mamawh a chatlak ṭan tawh nia sawiin NGO-te chuan, "Sumdawng leh mipui náwlpuiin kan tuar mek a ni," an ti a; district danga kawngte ngaihthah chuang loa Champhai-Aizawl kawng chu a chak thei ang bera siam turin sorkar an ngen tih an tarlang a ni.