KHAWTHLIR

DIET induction
DIET, Aizawl chuan nimin khan an auditorium-ah Pre-Service Teacher Education (PSTE) 2017-19 session atana first semester zirlaite pualin Orientation & Induction Programme an hmang a; principal Lalnuntluanga Hnamte-in zirlaite fuihna thu a sawi.

PRISM manifesto
PRISM chuan thuchhuah siamin, kum 2018-a Assembly MLA inthlan atana an inbuatsaihna kal zelah, PRISM manifesto tur an duan, 'Draft PRISM election manifesto 2018' an peih tawh tih an tarlang.

Karate ziahna
C Dosavunga lehkhabu buatsaih, 'Karate and Secret Methodology' tih chu nimin khan Aizawl Press Club-ah Art & Culture director R Hmingthanzuala'n a tlangzarh. C Dosavunga hian a lehkhabu hi MJA Public Library tan bu hnih a pe nghal a ni.

Art Workshop
IPR department leh Mizoram Art Development Society ṭangkawp chuan nimin khan Archive Hall-ah Art Workshop an buatsaih a, Planning secretary Dr C Vanlalramsanga'n a hawng. Workshop hian July 7, 2017 thleng a awh ang.

Chetsualnaah thi
Malsawmdawngzuala (14), Bairabi chu nimin chawhma dar 11 vel khan Bairabi-ah lirtheia chetsualna avangin a thi. Bairabi aṭanga thudawn danin, Malsawmdawngzuala hi truck silin a inhlawh ṭhin a, niminah pawh truck sil tura inkhalh chhuakin, truck aṭanga a dâk chhuak chu kawng sira truck dang ding hnung lama a intauh a nih rin a ni a, a chetsualna hmunah a thi nghal a ni.

Hostel hawng
Salem Veng, Aizawl mawng lama Lai Student Hostel sak thar chu July 3, Thawhṭanni tlai khan Lawngtlai district aṭanga thlan tlin MLA pahnih - minister of state C Ngunlianchunga leh parliamentary secretary H Zothangliana ten an hawng. Lai Student Hostel sak nan hian cheng 596.76 hman a ni.