HSSLC result-ah tihsual a awm Arts-ah pakhatna pahnih an awm

Mizoram Board of School Education (MBSE) chuan, July 14, 2020-a HSSLC Examination result tihchhuahah Arts-ah tihsual a awm thu an tarlang a, mipui hriat­thiamna an ngen.

Thu dawn danin, HSSLC Arts-a top 10-a lang pha lo Lalhlimpuii, St. Joseph HSS chuan Geography-a a mark hmuh zat 59-ah dik lo a awm nia hriain MBSE-ah complaint a thehlut a ni. MBSE-in an endik hnuah, Lalhlimpuii hian full mark 500-ah mark 454 a hmu a, hei hi pakhatna Christina Lalchhandami, Greenland HSS mark hmuh zat chiah a nih avangin, MBSE chuan Christina Lalchhandami nen pakhatna an ni tih a puang ta a ni.

Lalhlimpuii hi Dar­lawn khua, Ramhlun Venglaia khawsa mek a ni a; a mit a ṭhat loh avangin pawl 1-5 chu Special Blind School, Durtlangah a kal a, chumi hnuah pawl 10 thleng Presbyterian English School, Darlawnah a zir a, pawl 11 leh 12 chu St. Joseph HSS-ah a zir leh a ni. A mit ṭhat loh avangin lehkha ziakte chu inches 3-5 vela hnai aṭangin a chhiar thei hram hram niin an sawi.