Rajya Sabha MP K Vanlalvena

July 18, Inrinni khan Ronald Sapa Tlau chu Rajya Sabha MP a nih hun chhung a tàwp a; nimin aṭang khan K Vanlalvena (50) chu Rajya Sabha MP a ni.

Vanglaini palai zawhna chhángin K Van­lal­vena chuan, Ronald Sapa Tlau term a tàwp tak avangin thuneitute hnen aṭangin Rajya Sabha MP official-a a nih tâk thu a dawng tih a sawi a, "Confirmation letter chu naktuk (vawiin) hian an rawn thawn ang," a ti.

K Vanlalvena chuan, thutiam (oath taking) nei turin naktuk (vawiin) hian Delhi a pan dawn tih sawiin, "Covid-19 lèn lai a ni si a, keimahin ka kal ang. July 22 hian MP atan thu tiama lak luh ka ni dawn," a ti a; Mizorama a rawn haw leh huna quarantine period a hman zawh hunah theihtawp chhuaha hma a lâk ṭan tur thu a sawi.

Tarlan tawh angin, Mizoram Rajya Sabha MP tur thlanna hi June 19, 2020 khan buatsaih a ni a, MNF candidate K Vanlalvena hian vote 27 hmuin thlan tlin a ni.