MLA-in lirnghing tuarte a tlawh

Champhai North bialtu MLA Dr ZR Thiamsanga chuan nimin khan medical team-te nen East Tuipui bial chhunga lirnghing tuarte a tlawh kual.

Dr ZR Thiamsangate hian nimin khan Khuangleng Health Sub-Centre tlawhin, an dinhmun leh harsatna an en a, chumi hnuah Khawbung leh Samthang an tlawh leh a; a remchan angin a thlawna inentirna an buatsaih a ni. Damlote chu a thlawnin damdawi an sem nghal.

ZR Thiamsanga chuan, lirnghing chu mihring tih theih piah lam a nih avangin leh a thlen hun tur hriat theih a nih loh avangin mipuite chu rilru fím taka awm tura chah a; Pathianin Mizoramah chhiatna lian tham a thlentir phal a rin loh thu sawiin, lirnghing tuarte chu chief mi­nister-in a ngaihsak a, endik turin mi­thiam a tirh thu leh sorkar laipuiah pawh zir chiangtu tir tura a ngen thu a sawi.