MIZUTA-in MZU VC dah thuai an phût ; Politics ball-ah MZU hman an remti lo

Mizoram University Teachers’ Association (MIZUTA) chuan MZU vice chancellor (VC) nghet ruat thuai turin thuneitute an ngen a; MZU chu politics ball-a hman an remtih loh thu an puang.

MIZUTA hruaitute chuan nimin khan Aizawl Press Club-ah thuthar thehdarhtute an kâwm a; MZU vice chancellor atana Search Committee-in mi 3-5 an chhawp chhuahte chu sorkar laipuia Ministry Human Resource Development (MHRD) Minister kutah a awm mek tih sawiin, India President pawmpui tura thawn vat an phût thu an sawi a ni.

MIZUTA president Dr Lalnilawma sawi danin, MZU VC chhuak ta Prof. R Lalthantluanga term chu May 18, 2016-ah a tawp a, kalphung pangngai angin a term a tawp hmain VC Search Committee din a ni. Search Committee chuan MZU VC hna dil theih thu a tichhuak a, mi 100 chuangin an dil.

Diltu mi 100 chuang aṭangin Search Committee-in short list a siam a, chu'ngte chu April 23, 2016-ah interaction/interview neihpui an ni. Interview hnuah mi pathum chu VC thei turah ngaiin sorkar laipui lamah an thehlut a; mahse, eng emaw avangin India President chuan nikum May thla laihawl vel khan a hnâwl. VC tura rawt mi pathumte President-in a hnâwl hnuah, VC chhuak tur Prof. R Lalthantluanga chu May 18, 2016-ah a term pawhsei a ni.

Dr Lalnilawma chuan, an VC Prof. R Lalthantluanga chuan a term pawhsei a nih hnuah, term pawhseisak mai a nih tawh avangin thutlukna lian tham a siam ngam lo tih a sawi a, "Hei hian zirtirtute promotion leh thil dangah harsatna a siam nasa hle. Kan promotion a khawtlai phah a, a ṭhen chuan kum hnihte an nghah a ngaih phah a ni," a ti.

MIZUTA general secretary KC Lalmalsawmzauva chuan, VC term pawhsei Prof. R Lalthantluanga chu kum 70 a tlin tâk avangin February 28, 2017-ah a chhuak a, chumi hnuah MZU Ordinance angin, MZU-a professor zinga senior ber Prof. Lianzela'n March 1, 2017 aṭangin VC mawhphurhna a chelh ṭan a ni. Prof. Lianzela pawh VC nghet a nih loh avangin rilru khingbai tak chungin VC mawhphurhna a la zel rih niin an sawi.

KC Lalmalsawmzauva sawi danin, VC nghet awm loh vanga an harsatna chu MZU chief rector Lt.Gen. Nirbhay Sharma, Governor hnenah April 13, 2017-ah an thlen a; Governor chuan sorkar laipuiah a thlensak nghal a, VC Search Committee pawh din thar leh niin, Search Committee pawhin hma an la nghal a ni.

MZU VC diltute chu May 1, 2017-ah personal interview neihpui an ni a, chawlhkar khat vel chhunga tihfel nghal mai theih a nih laiin tun thlengin tihfel a la ni lo tih sawiin MIZUTA hruaitute chuan, "Thla khat leh a chanve a ral leh ta a, kan lungawi lo hle a ni," an ti.

MIZUTA hruaitute chuan, Search Committee-in an rawtnate May thlaa MHRD-a an thehluh tawh chu tun thlengin India President hnen a la thleng lo tih sawiin, "Tunah hian a file hi MHRD Minister-ah a awm tih kan chiang," an ti. MHRD-in an tikhawmuang tlat chu an hriatthiam loh thu an sawi.

MZU ang bawka VC dil mek university dang pali an awm tih sawiin MIZUTA hruaitute chuan MZU harsatna ang bawk chu university dangte harsatna a nih thu an sawi a; prime minister Narendra Modi sorkarin hma sawnpui mah se, ken tel a nei a, BJP sorkarin an mi leh sa dah a tum nia an lan theih thu sawiin, "Politics ball-a kan university hman an tum nia lang hi kan duh lo a ni," an ti.

India President (Congress party mi) Pranab Mukherjee chu July thla hian a term a tawp dawn a, MZU VC thar ruat chu President thar kutah dah an tum nia an hriat thu an sawi bawk.

Zawhna chhanga MIZUTA hruaitute sawi danin, Central university-a VC ni tur hian kum 10 chhung tal professor ni tawh an ngai a; tun dinhmunah Mizo zingah Central university-a VC ni thei mi 5/6 vel an awm. MZU VC ni tura Search Committee-in MHRD-a hming an pek luh zingah Mizo pakhat a tel an ring a ni.