SBI-in State Bank Day an lawm

SBI Regional Office, Aizawl chuan July 4, Thawh­lehni zan khan Lal Thanhawla Audi­torium-ah State Bank Day vawi 62-na an lawm a, Vanglaini editor K Sapdanga hnenah chawimawina an hlan nghal.

Inkhawmah hian Mizo­rama SBI regional manager Didyendu Chaudhuri-a'n kalkhawmte lawmna thu a sawi a; K Sapdanga chawi­mawina hun leh SBI-a thawk fate zirna lama ti ṭhate lawmpuina thilpek hlanna hun an hmang. SBI hian Vanglaini Editor hi chanchinbu khawvela a hnathawhte avangin chawi­mawina an hlan a ni.

K Sapdanga chuan, SBI-in an chawimawi dawn tih a hriatin a inthlahrun thu a sawi a, "India rama bank lian ber leh rintlak tak hnen aṭanga hetiang chawimawina ka dawng hi ropui ka ti hle a ni," a ti. SBI hnuaiah branch lian aiin branch tête dawr an nawm zel thu sawiin, bank-a thawk zawng zawngte chu hawihháwm taka customer-te dàwr ṭhin turin a ngen.

Inkhawmah hian SBI-a thawkte leh an fa zirna lama hlawhtlingte telin, SBI Aizawl Branch-ah zanriah an kîlho nghal a ni.