KHAWTHLIR

Thanggoliana (54) c/o Lalringa, Champhai Kahrawt Buangtlang chu nimin chawhma lam khan Tuipui Mualzen lí-ah thia hmuh a ni. Thu dawn danin, Thang­goliana hi July 17, 2020 tlai dar 4 vel khan Tuipui luiah a chesual nia hriat a ni.

July 17, Zirtawpni khan Lunglei Civil Hospital (LCH) laboratory-ah Truenat-PCR hmangin mi 43-te swab sample endik a ni a, July 18, Inrinni khan mi 36-te sample endik a ni bawk a; Covid-19 vei hmuh chhuah a ni lo. LCH labo­ratory-ah hian swab sample 771 endik tawh a ni.

July 18, Inrinni khan Aizawla Dinthar Branch KṬP chuan Synod Hospital blood bank-ah thisen unit 41 an pe a, petute mipa 37 leh hmei­chhia pali an ni. Ramhlun North ṬKP unit pawhin Aizawl Civil Hospital blood bank-ah thisen unit 23 pein, petute mipa 22 leh hmeichhia pakhat an ni a; pawl hminga pe ni lo mi 30 an awm bawk.

Mizoram IAS Association chuan nimin khan kumin HSSLC result chhuaka Science stream-a pakhatna Lalremsiama, Tanhril leh Arts stream-a pariatna Vanlalvenhimi, Durtlang North hnenah lawmpuina Rs. 25,000 ve ve an hlân. Thilpek hlan inkhawm hi Lokayukta chairman C Lalsawta pisaah buatsaih a ni a, Mizoram IAS Association member-te'n fuihna thu an sawi.

Champhai South bialtu MLA TJ Lalnuntluanga chuan Inrinni khan a bial chhung - Champhai Electric Veng, Zion Veng, Venglai, Bethel Veng, Vengthar, Tlangsam leh Champhai South-a HSSLC leh HSLC compartmental exam-a pass mi 146-te hnenah lawmpuina a hlan. TJ Lalnun­tluanga chuan, remchang hmasaah zirlaite kawng kawhhmuhna (career gui­dance) changtlung tak buatsaih tum a nih thu a sawi.

LADC chief executive member T Zakunga chuan July 17, 2020 khan Lawngtlai Press Club-ah Lawngtlai District MJA Welfare & Pension Rules 2020 a tlangzarh. T Zakunga chuan, social media-ah chanchin thar rang tak taka hriat theih a nih thu sawiin, "Thil tak takah chuan social media-a thu thehdarh 50% vel bâk rintlak a awm lo. Chanchinbumite hi an hlu tulh tulh a ni," a ti.