ZEM-in an thil tumte Lungleiah an puang

Zoram Exodus Movement (ZEM) hruai­tute chuan nimin khan Ono Restaurant, Chanmari, Lungleiah thuthar thehdarhtute an kâwm a, Mizorama hmasawnna ngêl­nghet din tura sorkar ṭha siam a nih theih nana hmalak an tum dan an sawi.

ZEM Steering Committee hruaitu zinga mi Rev. Dr K Thanzauva chuan, Mizo­ramah mipui lam hawi sorkar ṭha ding tawh se tih duhna lian mek chu media-te ṭhahnemngaihnain a cho chhuah nia sawiin, "Hei vang hian sorkar ṭha tungding turin media-te hi kawngro su thei ber tur an ni," a ti.

Rev. Dr K Thanzauva chuan, sorkar ṭha a pian theih nan a duh apiangte thawhho a, movement siam ṭul an tih thu sawiin, "Movement hming atan Zoram Exodus Movement vuah a ni a, ZEM-in a tum chu Mizorama hmasawnna ngêlnghet din tura sorkar ṭha siam a ni," a ti a; move­ment pian chhuah dan tur kawng dap turin Steering Committee siam a nih thu a sawi.

K Thanzauva chuan, ram vei sim thei lote chu inthurual a, zâi khatah luan ho a ngai tih sawiin, "Sorkar ṭha tungding tham kan tlingin kan hria. Chuvangin, duh thuhmun hote hmun khata luan dan kawng zawn ṭul an tihna avangin ZEM hi a piang ta a ni," a ti.

Inkawmhona kaihruaitu K Sapdanga chuan, ZEM chuan awm dan ṭha lo kalsan a, dikna, hmasawn, lungrualna leh chul lo tura Zoram din chu a tum bulpui a nih thu a sawi a, "Israel fate Aigupta sal aṭangin Pathianin a hruai chhuak angin, kan saltànna kawng hrang hrang aṭangin Zofate hi min hruai chhuak dawn a ni," a ti.

K Sapdanga chuan, ZEM thil tum hlawh­tling tura an hmalakna tur hrang hrang zingah, sorkar ṭha lo kalsan a, sorkar ṭha siam te, politics-a induhsakna aṭanga zirna hruai chhuah te, hmanlaia pipute eizawn dan mâwlmang tak aṭanga Zoram hruai chhuah te, party politics aṭanga Zoram politics thlentirte leh, chàwm hlàwm leh vehbûr khawn nun kalsante a tel thu a sawi bawk.

Lungleiah hian Zoram Exodus Steering Committee din nghal a ni a, steering committee member tan Chawngchhuana, CS Chhawngchhuma, V Kapchungnunga leh Eric Zomuanpuia te ruat an ni.