Ram pahnih aiawhte'n India-Bangladesh Inkara lei dawhna tur an enfiah

India leh Bangladesh sorkar aiawhte chuan nimin khan Tlabung bul, Kawrpui-chhuaha ram pahnihte insumdawn tawnna atana lei dawhna hmun tur an enfiah a; hmalak zel dan turte Tlabunga Trade Facilitation Centre-ah an sawiho nghal.

Trade Facilitation Centre-a ram pahnih aiawhte inbiakna hun kaihruaitu, Mizoram Commerce & Industries director J Hming-thanmawia chuan, ram pahnih aiawhte'n dawhkân khat kîla lei dawh tur an sawiho thei tur chu lawmawm a tih thu leh hmasawnna a thlen a beisei thu a sawi a, "Ram pahnih inkara inlaichinna ṭha taka vawnhim zel a ṭul a ni," a ti.

Bangladesh aiawhte hotu Rowshan Ara Khanam chuan, ramri kâna lei dawh tur chu ram pahnihte dawh zawmtu ṭangkai tak a ni dawn tih sawiin, "Lei dawh tura rua-hmanna tipuitling turin ram pahnih thawhho a pawimawh a ni,"a ti a; Bangladesh sorkarin ruahmanna tipuitling tur-in a inbuatsaih mek thu a sawi.

Bangladesh khawpui, Dhaka-a Indian High Commission pisaa first secretary leh Railways advisor Dibbanjan Roy chuan, "Ramria lei dawh tur hi ram pahnihte'n inkalpawh nan ṭangkai takin kan la hman dawn a, inpumkhatna leh inunauna vawn nun zelna atan thil pawimawh tak a ni ang," a ti.

An ṭhutkhawmnaah hian, tun dinhmunah hmalakna langsar hmuh theihin awm rih lo mah se, ram pahnih insumdawn tawnna tura India leh Bangladesh sorkarin hma an lak mek thu sawi lan a ni. Bangladesh team aṭangin an ram chhunga Land Custom Station hmun tur rua-hman lailâwk aṭanga a hnai thei ang bera lei dawh ṭha an tih thu te, lei dawhna hmun tur tihchian a nih veleh a panna tur kawngpui sial tum a nih thu te, Bangladesh Prime Minister-in a pawmpui tura thehluh tur ruahmanna duan a nih tawh thute an sawi.

Kawrpuichhuah kaltlanga India leh Bangladesh insumdawn tawnna tura ruahmanna tipuitling tur leh, Integrated Check Post (ICP) hmun atana ruahman enfiahin sorkar mi pawimawhte'n tum eng emaw zat Kawrpuichhuah an tlawh tawh a; May 27, 2015 khan Union minister of state for Home Kiren Rijiju leh Commerce & Industries changtu parliamentary secretary Joseph Lalhimpuia te pawhin an tlawh tawh a ni.

'Joint Feasibility Study' tia vuah, India ram chhunga ICP leh Bangladesh rama Land Custom Station thlun zawmnna lei dawhna hmun tur enfiah tur hian Bangladesh sorkara Roads & Highways department-a additional chief engineer Rowshan Ara Khanam-hoin sorkar mi pawimawhte an tel a; India aiawhin Mizoram Commerce & Industries director J Hmingthanmawia leh a kaihhnawih department aiawhte an tel bawk.