Vairengte dáia auto-rickshaw stand-a Street light vuah lâk thlak hrethiam lo

MZP chuan thu-chhuah siamin, Vairengte dáia auto-rickshaw stand-a auto-rickshaw khalhtute'n street light an dah chu Assam sorkara thuneitute'n hnawk an tih avangin an lak thlaksak niin an tarlang a, an hriatthiam loh thu an sawi.

MZP tarlan danin, street light awmna hi Vairengte aṭanga km. 1 vela hla, Vai-rengte auto-rickshaw-te dinna a ni a; passenger phurh tur an ṭhathnem ṭhin avangin zan dar 10-11 thlengte an ding ṭhin a, passenger-te him zawk nan Vairengte Auto Rickshaw Association (VARA)-in street light an dah a ni.

VARA hian hmun dangah an din chuan Assam lamin ram an zauh zel dawna an hriat avang-in an dinna chu an sawn duh lo nia sawiin MZP chuan, "Hemi chungchang hi chief minister Lal Thanhawla hnenah kan thlen a, CM chuan a ṭul anga bawhzui a ngaih thu a lo sawi a ni," an ti a; Assam-in Mizoram an neih belh zel loh nan chak taka hma la turin thuneitute an ngen.

MZP chuan, Mizoram leh Assam inrina laia awm Zaite khuaah tun thlengin kawlphetha a la lut lo tih sawiin, Zaite chu cheibâwl turin Mizoram sorkar an ngen bawk.

An tarlan danin, Zaite khua hi Inner Line Forest Reserve (ILFR) area-a awm niin, in 130 vel a awm a, Presbyterian Kohhranin an din sikul pakhat a awm. ILFR chhung-a awm ni mah se, Assam sorkar official ṭhenkhat, kumin tìr lama tlawhtute chuan Mizoram chhung metre 50 chu Assam ram chinah an chhál a ni.

MZP chuan, Zaite khuaah kawlphetha pe turin CM Lal Thanhawla hnenah a thlen tih an sawi a, "CM-in kumin chhung ngeia electric current pek tum a nih thu a lo sawi bakah, hna hmasaa neih a nih tur thu a lo sawi hi lawmawm kan ti hle a, CM chungah lawmthu kan sawi a ni," an ti.