Anganwadi worker thawk ṭhate award hlan

Social Welfare department chuan nimin khan Synod Conference Centre-ah kum 2016-17 chhunga anganwadi worker thawk ṭhate hnenah award an hlan a; khuallian, Social Welfare minister PC Lalthanliana chuan, April 1, 2017 aṭangin anganwadi worker leh helper-te hlawh 10%-a a pun tur thu a sawi.

PC Lalthanliana chuan, anganwadi centre chu Mizoram tan hriselna leh zirna bulṭhut pawimawh a ni tih sawiin, "Central kal-tlanga sorkarin nutrition a sem avangin thingtlang kilkhawr ber thlengin naupangin ei tur tha leh hrisel an hmu a, vitamin tlâkchham vanga chêr chhe tak tak hmu tur an awm tawh lo," a ti.

Social Welfare Minister chuan, anganwadi worker-te chu inthlahdah taka hna thawk thei an nih loh thu leh rawngbawlna leh hmangaihna rilru pûa thawk tur an nih thu a sawi a; a dawng tur dik takin nutrition semte an dawn theih nan rinawm taka thawk turin a chah.

State Level Best Anganwadi Workers Award 2016-17 dawngtute chu - CT Vanlalhruaii (Vai-rengte-II), Lalbelsangi (Mamit-II), Lalthanthiangi (Champhai Kanan-I), Lalhmingmawii (Khawkawn-II) leh Sangkimi (Bualte-I) te an ni. Award hian Rs. 5,000, thuchei leh thilpek dang a keng.