Sipai bángte hamṭhatna tur ngaihtuah

Sipai bángte leh an chhungte chhawmdawl leh hamṭhatna an neih theih nana din, Mizoram Rajya Sainik Board (MRSB) chu nimin khan Governor Lt.Gen. Nirbhay Sharma hoin Raj Bhavan-ah an ṭhukhawm.

Governor chuan, Mizoram sipai bángte chu kawng tinrengah sorkar leh khawtlang tana thawh hlawk, entawntlak leh ṭangkai an nih thu a sawi a, "Ram chhung hmun dang ngaihtuahin hei hi an danglamna bikna a ni. Mizoram Chief Minister panga zinga pathumte chu sipaia hnuhma nei an ni a, sipai bángte hi politics-ah sûlhnu ṭha tak tak nei an awm a ni," a ti.

Kum 1960 leh 1970 vela Mizo sipai ṭang leh tuna ṭang mek ngaihtuahin, an tlem tawh tih sawin Larsap chuan, "A bik takin officer level-ah phei chuan a inthlau hle a, mahse, hei hi Sainik School, Chhingchhipa kan neih takah chuan a kiam ka ring," a ti a; Sainik School-ah hmeichhiate an luh ve theih nan ṭan lak a nih thu a sawi.

Chief minister Lal Thanhawla pawhin, sipai bángte enkawl leh hamṭhatna hrang hrang pek leh siamsakte chu state leh central sorkar mawhphurna a nih ve ve thu a sawi a, "Hemi kawngah hian Mizoram sorkar chuan a theih ang angin ṭan lain theihtawp a chhuah. Sipai tam zawk hi kum naupangteah pension-in an chhuak a, hna dang an thawh leh theih nan hma kan la ṭhin," a ti.

MRSB meeting hnuhnung ber chu March 1, 2012 khan neih a ni a, nimin meeting-ah hian meeting hmasaa thurelte bawhzuina leh tihlawhtlin a nih dante thlirho a ni.