CADC sorkar ṭhiah a ni

Chakma Autonomous District Council (CADC) sorkar chu July 4, 2017 khan ṭhiah a ni. Hemi chungchanga hriattirna (notification) chu Governor thutlukna angin District Council & Minority Affairs secretary Rodney L Ralte-in July 4 khan a tichhuak.

CADC sorkar ṭhiahna notification-a tarlan dan-in, CADC-a executive member pariat zinga paruk chuan thla hnih vel kal ta khan bànna an theh-lut a; member of district council (MDC) 20 zinga 12 chuan chief executive member (CEM) ni mek Kali Kumar Tongchongya rin tawk lohna, no confidence motion leh CEM thar thlan/ruat rawtna tur an ruahman bawk.

Hei vang hian Mizoram Governor chuan India Constitution-a 6th. Schedule-a para 20B ang-in, CADC sorkara thuneihna zawng zawng leh sorkar a kal dan tur chu CADC awmna district, Lawngtlai DC kutah a dah a, Lawngtlai DC chu CADC Caretaker a ni ang.