Zirnaah national standard tling pha turin Ruahmanna a awm - Education Minister
School Education minister Lalchhandama Ralte chuan Inrinnia Ratu Higher Secondary School building thar a hawnnaah Mizorama zirna national standard tling pha tura ruahmanna a awm thu a sawi.
Mizoramah tun aia mumal zawka zirna a kal theihna atan sorkarin hma a lak mek thu sawiin Education Minister chuan, "Thil ṭhenkhat thlakthlengte pawh a awm a, kan zirna hi national standard tling pha tura ruahmannate pawh a awm. Zirna quality siamṭhat nan hun reiloteah Middle School Leaving Certificate Examination siam thar leh tum a ni a, school inspection pawh mumal zawka kalpui anih theih nan ruahmanna siam a ni," a ti.
Lalchhandama Ralte chuan khawtlangah zirnain hmun sang a channa hmunah chuan zirna quality a ṭha ṭhin tih sawiin, "Kan ram zirna hmun leh compound-te chu khawtlang hruaitute leh nu leh paten vil ngunpui a, tuaihnum a pawimawh. Zirna hi sorkar kutah ringawt dah chi a nih lo a, mipui nen ṭanrual a ṭul. Hmar tlangdung thim tieng turin zirna a pawimawh tih sorkarin a hria a, science zirnate pawh dah belh a ni a, zirtirtu pawh ṭhahnem tak dah belh a ni," a ti a, sorkar hmalakna hmang ṭangkaitu ni turin mipuite a sawm.
Ratu Higher Secondary School hi Lump sum Grant in aid a ni a, Ratu khua bakah an khaw ṭhenawm Lungsum, New Vervek leh East Damdiai aṭangtein an kal ṭhin. Academic session liamtaah khan zirlai 42 an nei. School Education Minister-in sikul a hawn thar hi cheng nuai 28.05 sénga sak a ni a, office ft. 18x24 leh class room pahnih ft.18x24 bakah, inthiarna pali a awm a ni.