Covid-19 veiin an venga thil a lei vangin Salem Vengin curfew an puang nghal

Myanmar lam mi, Delhi aṭanga Mizorama rawn lut, July 17, 2020-a Covid-19 vei hmuh chhuahin R Dengṭhuama Hall, Salem Vengah qua­rantine a nih laiin Salem Venga dawr pakhatah thil a lei avangin Salem Veng Local Task Force chuan Inrinni aṭang khan an huam chhungah curfew an puang.

Salem Veng khaw­tlang hruaitute hnen aṭanga thu dawn danin, Myanmar lam mi pakhat state páwn aṭanga rawn lut chu R Dengṭhuama Hall aṭangin Champhaia inkhung hrang turin thawn chhoh a ni a, a hnuah Covid-19 a vei tih hmuh chhuah a ni. R Dengṭhuama Hall-a a awm laiin, a bula thil zuar pakhat hnenah thil a lei tih hriat a ni.

Dawr neitute hi Salem Veng mi an ni a, hei vang hian Salem Veng LTF chuan an huam chhungah curfew an puang a ni. He thil thleng vang hian mi 15 vel swab sample endik tur a ni a, he thu ziah lai thleng hian an sample lâk a la ni lo. Swab sample endik result hriat a nih hma chuan curfew an puan rih dawn thu sawiin Salem Veng khawtlang hruaitute chuan, "Mi 15 vel result azirin sample endik belh zel pawh a ngai mai thei," an ti. An huam chhungah ­curfew puang mah se, Salem Veng chuan an huam chhung china Aizawl By-Pass Road-ah chuan tlân tlang an phal thu an sawi.

Phai aṭanga rawn hawte chu R Dengṭhuama Hall-ah an swab sample laksak an ni a, an awmna district-ah inkhung hrang tura kaltir an ni ṭhin. Myan­mar lam mi pawh hi Champhaiah inkhung hrang tura kaltir tawh a ni. Thuneitute chuan, Covid-19 vei tih hmuh chhuahin an venga dawr pakhata thil a lei thu hi July 17 zan Salem Veng LTF an hriattir a, dawr neitute chu home qua­rantine nghal an ni.