Hmeichhiate dinhmun chawikânah Mizoram hi a ti ṭha pawl kan ni - CM

Chief minister Lal Thanhawla chuan, Mizote kan khawtlang nunah chi inthliarna a awm lo chu vanneihthlak a tih thu a sawi a, "Hmeichhiate dinhmun chawikan kawngah Mizoram hi India ramah a ti ṭha pawl kan ni," a ti.

Serchhip town area MHIP-in nimina Serchhip P&E Veng YMA Hall-a MHIP Day an lawmna a hmanpuinaah thu sawiin Chief Minister chuan, "India ram hmun dang ngaih­tuahin chi leh chi inthliarna leh hausa leh rethei inthliarna kan nei nei lo a, caste-less leh class-less society pawh kan nei lo a, a ropuiin kan vannei hle a ni," a ti a; chutih rualin, Mizote'n society ṭha tak nei mah se, thawh chhuah leh hman ral a inmil loh chuan chhungkua a din chhuah theih chuan loh thu a sawi.

Chief Minister chuan, India rama hmeichhiate dinhmun chawikânna kawngah Mizoram chu a ti ṭha pawl a nih thu sawiin, "Hmeichhiate tana dan kan neih, The Mizoram Marriage, Divorce & Inheritance Act hi dan ṭha tak a ni a, hmeichhiate dinhmun a ṭhat loh chuan khawtlang ṭha kan nei thei lo. He dan hi kan ṭhat tlanna tur a ni," a ti.

MHIP member-te chu chhungkua, khawtlang leh kohhran nunah an dinhmun a pawimawhzia hre thar zel tura chahin CM Hawla chuan, "Khawtlang nun siamṭhatna kawngah te, kohhran nun tihchak kawngahte leh ram leh hnam siamna kawngah nasa leh zawka an mawhphurnate hlen chhuak turin theihtawp chhuah ang che u," a ti a; MHIP member-te chu hmeichhiate dikna leh chanvo atana ding an ni tih hre thar leh turin a chah.

Chief Minister chuan, naupangte'n an naupan laia an zirte chu an puitlin thlengin a chhawm ṭhin tih sawiin, "Chhungkua anga inzirtirna ṭha a awm chuan a ber kan kaina chhuanawm loh tak tak - cancer-a kan sànna te, HIV/AIDS vei tam ber state pathum zinga pakhat kan ni te, naupang kumtlinglo khuaikhemnaa kan sânna te, vaihlo hmannaa India rama state sang ber kan nihnate kan pumpelh thei ang tih min ngaihtuahtir. Kan zavaia mawhphurna ni mah se, hemi atan hian hmeichhia, a bik takin nu ho hi in pawimawh leh zual a, mawhphurna in nei sang a ni," a ti.

MHIP Day lawmna hi Serchhip Town Area Committee president Sanghmingliani'n a kaihruai a; khualzahawm, Serchhip DC Sangchhin Chinzah leh MHIP Gen. Hqrs. president Saipuii te pawhin thu an sawi a ni.