ZEM-in an hmalakna an puang zar

Zoram Exodus Move­ment (ZEM) Steering Committee member pahnih, Rev. Dr K Than­zava leh K Sapdanga te chuan nimin khan Hnathial leh Serchhipah thuthar thehdarhtute an kâwm a, ZEM hmalak tum dan an sawifiah.

Rev. Dr K Thanzauva chuan, ZEM chu Mizoram hmasawnna tura sorkar ṭha siam duh pawl an nih thu sawiin, "A duh apiang tan zawm leh thawhpui theih kan ni. Kan hmathlir chu 'Zoramtiam' a ni a, kan mission chu 'Chul lo tur Mizoram' siam a ni. Hei lo hi ram dang kan nei lo. Kanan ram pawh oil awm lohna, ram rethei a ni; mahse, Lalpa ram tiam a ni a, chutiang bawkin Zoram hi kan tan Lalpa ram tiam chu a ni," a ti.

Exodus awmzia sawi­fiahin Dr K Thanzauva chuan, "Mizoram chhuah­sana pèm lam a ni lo. Developed Mizoram, dikna, hmasawnna, lung­rualna, 'Chul lo tur Zoram' din hi a ni," a ti a; ZEM chuan sal tànna hrang hrang - politics, eco­nomics, education, corruption, administrative system inawpna fel lo leh ṭha lo lak aṭanga Mizoram hruai chhuak tura hmalak a tum thu a sawi.

Dr K Thanzauva sawi danin, ZEM hian Mizo­ram sorkar ṭha taka a kal theih nan Val Upa uapna a mamawhah a ngai a, Val Upa Council an din a ni. Val Upa Council chuan MLA candidate leh Chief Minister tur an thlang ang.

K Sapdanga pawhin thu sawiin, "Kan ramah party system-in sorkarna an siam ṭhin a, tuna kan Chief Minister ni mek hian kum 20 dáwn min hruai tawh. MNF party President ni se, kum 10 min hruai tawh bawk a. Anni hi chuan sàn lam min panpui thei lo tih kan hre vek tawh a, party pahnih hruaitute hi inthlakthleng thei dawn se, an hoa movement siamte hi kan duh em em a, mahse, chu chu thil theih a ni dawn lo," a ti.