Kohhran 9-ah member 10,67,487 an awm

Economics & Statistics department-in tun hnaia tihchhuah, Statistical Handbook, Mizoram 2016-a a lan danin, kohhran pawl hrang pakuaah member 10,67,487 an awm a; member ngah ber Presbyterian Kohhranin member 5,98,785 an nei.

Staitistical Handbook 2016-in kohhran hrang a tarlante chu - Presbyterian Kohhran, Baptist Church of Mizoram (BCM), Salvation Army, UPC (North East India), UPC (Mizoram), Seventhday Adventist (SDA), Evangelical Church of Maraland (ECM), Lairam Isua Krista Baptist Kohhran (LIKBK), Roman Catholic leh Isua Krista Kohhran (IKK)-te an ni. LIKBK erawh member zat leh thil dangte tarlan a ni lo.

Presbyterian Kohhrana member 5,98,785-te chu mipa 2,94,823 leh hmeichhia 3,03,962 an ni a; tualchhung kohhran (local church 2,028 neiin, an kohhran hnuaia thawk (a nghet leh nghet lo) mi 2,867 an awm. Missionary 1,922 an tir chhuak a ni.

Kohhran lian ber dawttu, (BCM)-in member 1,67,815 neiin, mipa 83,951 leh hmeichhia 83,864 an ni a, tualchhung kohhran 642 an nei. An kohhran hnuaiah thawktu 634 an nei a, missionary 1,098 an tír chhuak. UPC (NEI)-ah member 1,00,063 awmin, mipa 49,808 leh hmeichhia 50,255 an ni a; tualchhung kohhran 774, thawktu 395 leh missionary 164 an nei.

Salvation Army-a tualchhung kohhran 408-ah member 56,680 an awm a, mipa 28,080 leh hmeichhia 28,600 an ni. Thawktu mi 169 leh missionary 331 an nei. Mizoram UPC-ah tualchhung kohhran 390 a awm a, member 51,804 awmin, mipa 26,705 leh hmeichhia 25,099 an ni.

ECM-ah tualchhung kohhran 90 leh member 42,588; Roman Catholic-ah tualchhung kohhran 24 leh member 21,907; Seventhday Adventist-ah tualchhung kohhran 234 leh member 14,919; IKK-ah tualchhung kohhran 110 leh member 12,926 an awm bawk.

Kohhran pakuate missionary (permanent leh temporary) neih zat belhkhawm chu 4,038 a ni.