Lirnghing tuarte DC hoin tlawh kual
Champhai District Disaster Management Authority (DDMA) chairman Maria CT Zuali, bawrhsap hoin disaster management team chuan July 18, Inrinni khan July 17 zana lirnghing vanga chhiatna thleng leh mipui dinhmun ngaihvenin Tuipuiral khaw hrang hrangah an kal kual a; lìr a nghìna awm dan turte an hrilh bakah, ṭanpuinate an pe bawk.
Disaster management team-te chu hlawm sarihah inṭhenin, Tuipuirala khaw 27-te an tlawh chhuak vek a; khaw hrang hrang hnenah solar light, first aid kit, tui thianghlim in tur leh pawisate an pe a ni. Champhai DC kaihhruainain lîrnghing tuarte chhawmdawl leh ṭanpui nan kawng hrang hrangin hmalak a ni tawh a, mahni ina riak ngam lote riah lailâwkna tur riahbûk (temporary shelter) sak nan khaw pariat hnenah mau ṭhahnem tak pek tawh niin, khaw dangahte pawh a ṭul anga pek zel tum a ni. Riahbukahte chuan inthiarna leh eirawngbawlna turte ruahman a ni a, power supply siam tel vek tura tih a ni bawk.
Champhai Bawrhsap kaihhruaiin chhiatna laka mipui himna turin District Infrastructure Quality Control Body (DIQCB) din tum a ni a; din a nih hunah chuan in sak, lung rem leh khaw chhunga kawng siam hna thawk turte'n DIQCB-ah an hriattir hmasak zel a ngai dawn a ni.