MNF-in Laldenga sûnna hun an hmang War of Independence documentary an tlangzarh

Nimin, July 7 kha Mizo National Front (MNF) dintu leh Chief Minister hlui, Laldenga thih champha a ni a; Treasury Square-a a thlanah MNF-te'n nimin zing khan amah sûnna leh hriatrengna hun an hmang. Chhunah Mizo Hnam Rûnah ‘Documentary of Mizoram War of Independence 1966-1986’an tlangzarh bawk.

Nimin zinga Laldenga sûnna hunah hian MNF president Zo­ram­thanga, Laldenga nupui Lal­biakdiki leh MNF party hruaitu ṭhahnem takin thlânah sûnna leh hriatrengna pangpar an dah a; inkhawm tawitê buatsaih a ni.

Chhûnah MNF pisaah ‘Do­cumentary of Mizoram War of Independence 1966-1986’ tlang­zarhna inkhawm neih a ni a, MNF senior vice president Tawnluia'n kaihruaiin, Rev. Vanlal­bela, Bawngkawn-in hunserh a hmang a; MNF President bakah, Central YMA, MZP leh MSU President ṭheuhin thu an sawi.

MNF president Zoramthanga chuan, India leh MNF remna thuthlung chu fel leh fing intite'n sawiselna chi tinrengin an sawisel ṭhin tih sawiin, chuti chung chuan inremna thuthlung chu a rei tulh tulha, a hlu tulh tulh tih ṭhangtharten an hre chiang zel niin a sawi a, "Kan inremnaah khan Mizoram chu state-ah hlankai a ni ang, tih te, Mizoram chu venhimna bik (Article, 371G) pek te, special category state kan nihna tur te, ILP-ah Mizote ráwn lo chuan Parliament-in a tidanglam thei lo ang, tihte a tel," a ti.

Parliament dan siam nazawng chu bán phara tihdanglam theih a ni tih sawiin Zoramthanga chuan, "Kan inremna kha chu a lehlam lehlam kan in-withdraw hma loh chu tihdanglam theih a ni lo," a ti a; Memorandum of Settlement chu chiang leh zuala hre turin Zoram mipui a chah.

MNF President chuan, Mizote'n Israel aiin ram an nei ṭha nia sawiin, "Ruahtui tlak ṭhatna ram, sakhaw khat bia, ṭawng khat hmang, Pathian Thlarau Thianghlimin harhtharna a pek zin ber Mizoram malsawmna ruai hai chhuak a, khawvel leh India hriata pho chhuak turin Mizo zawng zawngin kohna kan dawng mek a ni," a ti.

CYMA president Lalbiak­zuala chuan, Mizo hnam move­ment a taka tawngtute ziah chu a rintlak tih sawiin, "Kan zirlaite'n Mizo hnam movement chungchang an hre tur hi a lawmawm a, research ti zel tur tan a pawimawh. Ram leh hnam tana thawktute kha an zahawm a, kan ngaihsan rawn tur a ni," a ti a; MNF-te chu ram leh hnam tana thawk zel turin a chah.

MZP president Lalsangzuala Ngente leh MSU president RB Lalmalsawma te pawhin thu an sawi a; MNF NCC member Lalchamliana'n ‘Mizo nationalism movement leh Laldenga’ tih thu a sawi bawk.

MNF dintu Laldenga hi July 11, 1927-ah Lunglei Pukpuiah a piang a, kum 1959-ah Mizo National Famine Front dinin, chu chu October 22, 1961-ah Mizo National Front tia thlak a ni. A kaihhruaina hnuaiah MNF-te'n February 28, 1966 zanlaiah India aṭanga Mizoram zalen thu independence an puang a, kum 20 hnu, June 30, 1986-ah India sorkar nen inremna an ziak.

Laldenga hi kum 1986-ah Mizoram sorkar lailawkah chief minister a ni a, kum 1987-a state Assembly inthlan hmasa berah Sateek leh Aizawl North-II bialah thlan tlin niin, Mizoram state-a chief minister hmasa ber a ni.

Kum 1990-ah Memorial Sloan Ketering Cancer Centre, USA-a thla thum enkawl a nih hnuin Mizoram pana an haw kawngah, Ashford Hospital, London-ah July 7, 1990 tlai dar 2:30 (India hun)-ah a thi a, July 11, 1990 tlaiah Aizawlah a ruang thlengin, July 13, 1990-ah state funeral-a vui a ni. Laldenga hi Mizote zinga state funeral-a vui awmchhun a la ni.

Laldenga thih champhaah hian Mizorama district head­quarters ṭhenkhatah pawh hun hman a ni bawk.