ZEM-in Dist. 3-ah Committee siam
Zoram Exodus Movement (ZEM) hruai-tute chuan July 6, Ningani khan Serchhip Tourist Lodge-ah thuthar thehdarhtute leh Serchhipa mi ṭhenkhatte an kâwm a; ZEM hmalak tum dante an hrilhfiah hnuah Dist Convener an inruat nghal.
Inkawmhona hun hi ZEM Steering Committee member K Sapdanga'n a kaihruai a, Rev.Dr K Thanzauva'n thu a sawi. Zawhna leh chhanna hunte hman a ni.
Rev.Dr K Thanzauva chuan, tun hma lamah hmasawnna chu luipui kama in-nghat a ni ṭhin a, chumi hnuah politic-ah a innghat leh tih sawiin, "Tunah erawh chuan hmasawnna hi knowledge base-a a kal tawh avangin, zirna lamahte ṭan kan lak a ngai nasa em em a ni," a ti.
K Thanzauva chuan, Mizoramah sorkar in zirna atan sum a seng tam tial tial a, sorkar sikula lut an tlem tial tial nia sawiin, "Kan ram nghahfak tur chherna pûm sikul ber heti taka sawpchhiat a nih chhan hi zirnaah politics an inrawlh nasat vang a ni a, politics inrawlh zirna aṭanga kal chhuah (exodus) a ṭul tawh a ni," a ti.
Rev. Dr K Thanzauva chuan, "Hmasawnna hna tenau deuhte party induhsak nan kan sem ral a, hna lian deuhte chu ram hruaituten sum tuak nan an zenpui theih tur contractor an thawhtir a, hmasawnna hna a chhiatphah a, mipuiin kan tuar a ni. Keimahni leh ṭhangthar la awm zel turte tana 'Developed Mizoram' siam a ngai a, ZEM hmangin Zoram tluchhe mek hi tungding leh tura sorkar ze thar siam kan tum a ni," a ti a; ZEM-a fatu turin Zoram mipui zawng zawng a sáwm a ni.
K Sapdanga chuan, ram vei chu sim theih ni se a thil châk berte zinga mi a nih thu sawiin, mi ṭhenkhatte'n inthlan dawn apianga vûng chhuah ṭhin ni awma an puh thu te, politics chu a eizawnna nen pawh inrem lo a tih thute sawiin, chutih rualin, tu leh fate chên vena tur ram siam-
ṭha tura beih chu a mawhphurhna nia a hriat avangin, political party awmsaa lut loa ram siamṭha tura beih zel a tum thu a sawi bawk.
ZEM Steering Committee member B Lalchhanzova pawhin thu sawiin, "Mizote'n chhuan tur kan nei ve lo hian kan moral nasa takin a tichhia a, mipui pawhin sorkar ṭha kan neih theih an ring tawh lo hial a ni," a ti a; mahse, Pathianin Mizoram chu engtikah emaw a tihdam ngei a beisei tih a sawi.
Zoram Exodus Movement hian Aizawl, Lunglei, Hnahthial leh Serchhip-ah Committee/convener an indah a ni.