PUC-in zirlai ti ṭhate chawimawina hlân

Pachhunga University College (PUC) chuan nimin khan an college Multipurpose Complex Auditorium-ah kumina an zirlai lut tharte lawmna, Freshers' Social leh zirlai ti ṭhate lawmpuina hun an hmang.

PUC principal Dr Tawnenga chuan zirlai tharte lawmna thu sawiin, college leh anmahni tan an theihtawp chhuah turin a sawm a; pass mai duh tawk lo a, thiamna tak tak neih tuma zir turin a chah bakah, mi dangte tana chhenfakawm taka hun hmang thei tur leh PUC thupui 'Learning and service' hre reng turin a chah. Tawnenga chuan, "Zirna ṭha awm tur chuan thawhhona ṭha a pawimawh a, 'Unity is our strength' tih hi kan hre reng tur a ni," a ti.

PUC-ah hian zirlai lut thar Arts-ah 506, Science-ah 386 leh Commerce-ah 62 an awm a, an vaiin 954 an ni. Third semester leh fifth semester zirlaite nen zirlai 2,387 an awm mek. PUC-ah hian department 21 a awm a, zirtirtu nghet 103 leh thawktu dang 100 chuang an awm a ni.

PUC hian tun hnaia Mizoram University hnuaia under graduate exam-a an zirlai pass tharte lawmpuina hun an hmang nghal a; an zirlai Arts-ah 72.45%, Science-ah 60.82% leh Commerce-ah 80.95% an pass. Subject topper 23 zinga 15 (65.2%) leh subject hrang hranga rank holder ni thei 216 zing-a 109 (50.46%) chu PUC zirlaite an ni.

PUC aṭang hian gold medalist pa-hnih an awm a; Arts-a mark hmu sang ber Lal-mawizuali, History hnenah HK Bawihchhuaka Award, Commerce-a mark hmu sang ber Brian Laldinsanga hnenah Khawtinkhuma Award, Science-a mark hmu sang ber Vanlalhriatsaka, Statistics hnenah Lenrualhlui Award hlan a ni. Pianphunga rualbanlo R Lal-rammawii, Sociology hnenah Special Award an hlan bawk.