Mamit district-a kawng dinhmun sawiho

Mamit DC Lalbiaksangi hoin nimin khan an district chhunga fûr ruah-tui tlain kawngpui a tihchhiatte thawm ṭha tura hmalak dan ngaihtuahin kawngpui enkawltu department leh contractor-te an ṭhukhawm.

DC Lalbiaksangi chuan, kuminah kum dang aia ruahtui a tlak tam avangin kawngpuite a chhe nasa tih a sawi a, "A bik takin buhfai leh eirawngbawlna gas-ah duhthusam kan pha lo ṭan a, hei hi kan châkkhai lak luhna kawngpuite supply contractor-te’n an zawh ngam loh vang a ni," a ti.

Mamit DC chuan, mipui châkkhai phur lirthei liante'n an tumna hmun an thlen ngei theihna turin kawngpui chhe laite chu hnawhkhata siamṭha turin kawng enkawltute a hrilh nghal.

Bairabi Tlawng lei chu dawh zawh tawh ni mah se, a panna kawngte a chhiat vangin leh leiin a dâwl tawk endikna (load test) tih a la ni lo a, châkkhai phur motor-te chu kaltlang phal a la ni lo. Chumi vanga harsatna awm hrang hrangte chu meeting-ah hian sawiho a ni a; a rang lama load test tih a, a panna kawngte siam ṭha turin PWD, Kawrthah Division leh contractor-te chu ngen an ni.

Dâpchhuah leh Mamit inkar, National Highway kawng siam hna khawihtu PWD hotute chu a rang lama motor lian pawh táng loa an tlang theihna tura siamṭha turin ngen an ni a; Dampui ngaw hêlna pawh a rang lama lai tlang a, mipuite harsatna sutkian a nih theih nan chak taka hma la tura ngen an ni bawk.