SBI-in fimkhur turin mipui an ngen

State Bank of India (SBI) chuan thuchhuah siamin, tun hnaiah mi bum hmangte'n internet banking/online banking hmangin bank account neite kawng hrang hranga bumin, an account-a pawisate an rûksak ṭhin thu an tarlang a, fimkhur turin mipui an ngen.

Bank account changchang phone-ah tu mah hrilh loh tur a nih thu tarlangin SBI chuan, "SBI pawhin kan customer-te phone a biak cháng kan nei ṭhin, mahse, phone-a detail hrilh turin kan ti ngai lo a, thil ṭulte kenga branch-a kal turin kan hrilh zawk ṭhin. Account a him zawk nan branch-a finfiah zel a finthlak ber a, phone call leh Whatsapp hmangin i detail-te pe lo hram turin kan ngen a che u," an ti.

SBI-in inbumna langsar an tarlante

    Playstore aṭanga application download turin an ti a, chumi hnuah miin mobile a khawih lai reng chu remote-in an control ṭhin.

    Account detail leh ATM detail online-a thehlut turin an dil ṭhin.

    SIM card thi tur leh mobile bill pek loh chhuanlamin pek dan tur link leh application install tur an hrilh ṭhin.

    KYC online-a submit turin, Aadhaar number, voter ID, etc. an dil.

    Account KYC update/mobile no/PAN no. etc. update nan a hnuaia link-ah hian lut rawh tih SMS an thawn ṭhin.