Mamitah zirlai ti ṭhate chawimawi

MZP headquarters, Mamit chuan nimin khan Chhim Veng YMA Hall-ah Mamit khawpui chhunga HSLC distinction-a pass-te leh HSSLC distinction leh first division-a pass-te chawimawina hun an hmang a, Lalruatkima, MLA-in a hmanpui.

Lalruatkima chuan, Mamit khua chu zirna lamah an hnufual rei thu sawiin, "Tunah chuan kohhran hmalaknate avangin sikul ṭha tak takte a awm ta a, chawi-mawi tlak zirlai ṭha tak tak an awm ta hi a lawmawm hle. Hei hi hmasawnna hmêl duh-awm tak a ni," a ti a; Mamitah science leh commerce zirna a awm thuai a beisei thu a sawi.

Lalruatkima chuan, zirlaite chu tuna chawi-mawina chu hlawhtlinna tluantling a la ni lo tih hre tur leh an hma lamah thawhrimna tur tam tak paltlang tur a awm tih hria a, degree ṭha zawk nena Mamit tihming-ṭhatu ni zel turin a chah a, "Kan hlawhtlinna tur min dâltu hrang hrang, social media, ruih theih thil leh nulat tlangvalna lakahte a tâwkfang hriat a ngai. Hrehawm hmasak loh chuan hlawhtlinna a awm lo," a ti.

MZP-in zirlai an chawimawite hi HSLC-ah mi paruk leh HSSLC-ah mi 17 an ni.