KHAWTHLIR

Phalna thupek sût
Traffic SP chuan, July 5, 2017-a thupek a lo chhuah tawh, MG Road-a Bible House ṭhiah tâk bul kawngpuia LMV leh 407 truck-te tlan phalna thupek chu sût a nih thu a tarlang. Traffic SP thupek hmasa hi July 10-a hman ṭan tura tih a ni a, Aizawl District Disaster Management Authority-in a him tâwk loa an hriat avangin thupek hi hman a nih hmain sût leh a ni. He kawngah hian two wheeler bâk tlan phal a ni lo.

MLA-in pe
Mamit bialtu MLA John Rotluangliana chuan model village atana a thlan, Dapchhuah khua chu zûk leh hmuam awm lohna khuaa puan a nih theihna atana hmalak meknaa hman atan Rs. 20,000 a pe.

Workshop khâr
IPR department leh Mizoram Art Development Society ten Archive Hall-a ni li awh Art Workshop an buatsaih chu nimin khan khâr a ni. Workshop-ah hian lemziak leh lemker lama tui mi 50 chuangin an duh ang lem an ziakin an ker a ni.

Thisen pe
Helen Lowry Higher Secondary School chuan nimin khan Aizawl Civil Hospital tan an sikulah thisen unit 68 an pe a, a petute mipa 51 leh hmeichhia 17 an ni.

MPESSA conference
Mizoram Planning, Economic & Statistical Service Association (MPESSA) chuan nimin khan Millions' Resort-ah General Conference vawi 12-na an hmang a; statistics changtlung zawk neih a nih theih nan te, NEDP, NLCPR leh NEC hnuaia project-te chak zawka kalpui a nih theih nan infuihna hun an hmang.

NEC-in pawm
Kolasib Project Venga 'Multi-Utility Centre with Auditorium' sakna tur chu North Eastern Council (NEC)-in July 6, 2017 khan a pawm. Auditorium sak nan hian cheng nuai 800 ruahman a ni. Thudawn danin, NEC-in Kolasiba Multi-Utility Centre with Auditorium sak a pawmpui hnu hian DPR siam a ni anga, DPR peihfel anih velah sanction turin hmalak chhunzawm lehnghal a ni ang.