Minister-in sangha tui awp keuna a tlawh

Fisheries minister K Lalrinliana chuan Inrinni khan Bairabi kawnga sangha tui awp keuna (carp hatchery unit) Little Galilee-a sangha tihkeu hmasak ber a en. Ram páwn aṭanga sangha notê lak luh ngai lo a, sangha notê leh a chaw-a Mizorama intodelh a nih theih nan hmalakna pawimawh tak a nih thu a sawi.

K Lalrinliana chuan, Covid-19 vangin bungraw hrang hrang state páwn aṭanga lak luh a harsat thu sawiin, "Sangha notê lak luh kawng­ah pawh harsatna a awm. Hei vang hian sangha chî leh a chawa kan intodelh theih nan sorkarin hma a la mek. Little Galilee aṭangin a hmasa ber atan sangha chi nuai 10 vel tihkeu a ni a, thla thum hnuah hralh chhuah theih tura beisei a ni,” a ti.

Sangha notêa intodelh a nih theih nan department hmalakna sawiin Minister chuan, "Little Galilee Hatchery Unit bakah hian Lengpui, Ṭamdil leh Zobawkah sangha tihkeuna hmun ruahman a ni. Heng hmun aṭangte hian hlawhtling takin sangha chî kan tikeu thei a nih chuan intodelhna lama hmasawnna ropui tak a ni dawn," a ti a, Pradhan Mantri Matsya Sampada Yojana chu sangha hmanga eizawngtute dâwm kân nan leh sanghaa intodelh theih nan ṭangkai taka hman thuai a beisei thu a sawi.

Little Galilee hi April 2019 khan Blue Revolution hnuaia bul ṭan a ni a; kumin July thla tìr khan Katla, Rohu leh Grass carp sangha notê a vawi khat nan nuai 10 vel tihkeu niin, September thlaah hralh theih beisei a ni.