Ni hnih chhungin hripui vei 253 hmu chhuak

Mizoramah Covid-19 vei August 12, Zirtawpni khan mi 139 hmuh chhuah a ni a, August 13, Inrinni khan mi 114 hmuh a ni bawk. Nimin leh Inrinni khan hripui vei dam tawh mi 349 chhuahtir an ni a, Zirtawpni zan khan Covid-19 vanga thi pakhat a awm.

August 12-a hripui vei hmuh thar mi 139-te chu mipa 65 leh hmeichhia 74 an ni a; rapid antigen test (RAT) hmanga hmuh vek niin, positivity rate 21.22% a ni. Inrinnia Covid-19 positive hmuh thar mi 114-te chu mipa 43 leh hmeichhia 71 an ni a, RAT hmanga hmuh vek niin, positivity rate 25.68% a tling.

Nimin khan hripui vei dam tawh mi 157 chhuahtir an ni a, August 12, Inrinni khan mi 192 chhuahtir an ni.

HC Lalrochana (21), College Vaih-I, Siaha chu August 12, 2022 zan dar 6:45 khan Siaha DCHC-ah a thi a, natna dang nei tel a ni. August 7, 2022 khan hri a vei tih hriat chhuah niin, Siaha DCHC-ah dahluh nghal a nih thu sorkar thu chhuakin a tarlang.

IDSP record angin, Mizoramah Covid-19 vei 2,35,179 hmuh chhuah a ni tawh a, mipa 1,09,546 leh hmeichhia 1,25,633 an ni a, mipa aiin hmeichhia 16,087-in an tam zawk. Nimin tlai dar 5 thleng khan mi 2,33,643 (99.35%) chhuahtir an ni tawh a, mi 717 (0.30%) thi tawhin, enkawl mek mi 819 (0.35%) an awm.

Kum 2011 chhiarpui angin, Covid-19 vei hmuh tawh 2,35,179 chu state mipui zat aṭangin 21.55% a tling a; mi 1,000 zelah positive 214 an awm tawh ang a ni a, hripui vangin mi 1,00,000 zelah mi 65 an thi tawh ang a ni.